صوت المدونة

السبت، 2 مايو 2009

الحلقة الثالثه ..... ابوجهل 2009




سبنا أبو جهل وصديقه إبليس نايمين .. صحيوا متأخر من الهباب اللي كانوا بيشربوه طول الليل


إبليس – إبو الحكم .. أبو الحكم .. إصحى .. قوم
أبو جهل – عايز ايه يا إبليس .. ما تسيبني أنام شوية يا أخي


إبليس – يا عم قوم .. اتأخرنا قوي .. ورايا كام مشوار مهمين


أبو جهل – طيب طيب .. هاقوم اهه


ينزل أبو جهل وإبليس .. أبو جهل يسترعي انتباهه البوسترات الكبيرة بتاعة المغنيات .. والراقصات .. وكل حاجة في آخرها آآآآآآت




أبو جهل – صور مين دول يا إبليس .. ومين اللي صورهم قبل ما يلبسوا كده ؟


إبليس – يا أخي انت هتفضل متخلف كده على طول .. أولا دي صورهم وهم لابسين .. هم هدومهم .. كده .. ثانيا دول يابني نجوم المجتمع .. الشباب ممكن يقعدوا يسمعوهم ساعتين تلاتة عشرة يرقصوا ويغنوا مافيش مشاكل


أبو جهل – مسلمين برضه ؟


إبليس – طبعا امال ايه .. مش قالوا لك دي نقرة ودي نقرة ؟؟


أبو جهل – طب سؤال أخير .. الله يخليك


إبليس – إسأل .. بس بلاش أسئلة غبية


أبو جهل – أنا أصلي ما شفتش حد خالص من يوم ما جيت بيقرا قرآن .. هو القرآن ملغى السنة دي ؟؟


إبليس – لا يا غشيم .. أنا خليت الناس تحب الأغاني دي قوي .. فماحدش منهم بقى عنده مزاج يقرا قرآن ولا يسمعه حتى


أبو جهل – أصل محمد وأصحابه ما كانش ليهم شغلانة غير قراية القرآن .. لما خلوا الواحد مش عارف يعيش في مكة .. ده المسلمين الزمان ده


احسن كتير بصراحة .. الله ينور يا إبليس يا حبيبي


إبليس – وعليك يا باشا




ماشيين في أمان الله .. فجأة عربية من ناحية اليمين كاسرة الإشارة ومنطلقة بأقصى سرعة .. السائق بيدوس فرامل بشدة وراح لابس في عربية الغلابة أبو جهل وإبليس


ينزل السائق .. يشتم بكلام بذئ جدا .. وينهال بالضرب على أبي جهل المذهول من الموقف .. وإبليس يحاول يخلصه .. والناس واقفة تتفرج




السائق – انت حمار ؟؟ .. انا نفسي اعرف مين ابن .... اللي علمك السواقة .. الله يخرب بيت ....


إبليس – انت اللي غلطان وكاسر الإشارة .. وكمان بتشتم ؟؟


السائق – أقسم بالله العظيم .. أقسم بعزة جلال الله .. انت اللي غلطان .. إنت اللي كاسر الإشارة .. انت ما بتشوفش يا بهيم انت


أبو جهل – وبتحلف كذب يا راجل انت ؟؟ يعني غلطان وتحلف كذب ؟؟


(يميل على إبليس) - مسلم ده برضه ؟؟


إبليس – آه طبعا .. انت مش شايفه بيحلف بالله ؟




أمين الشرطة يقرب منهم .. الراجل السواق راح غامزه ببريزتين ..




أمين الشرطة لإبليس – انت اللي كنت سايق ؟؟ .. رخصك لو سمحت


إبليس – رخصي ليه ؟؟ .. ده هو اللي كاسر الإشارة وغلطان


العسكري – انت هتشوف احسن مني .. وللا هتعلمني شغلي


أبوجهل لأمين الشرطة – ياراجل انت .. أنا شايفه بيديك فلوس .. انت مسلم انت ؟؟ .. بتشهد زور يا مفتري ؟؟


أمين الشرطة – إنت كمان هتقل أدبك ؟؟ .. طب بطاقتك بقى .. أنا هاعمل لك محضر تعدي


ابو جهل يضرب كف على كف ويقول لإبليس – ياعم هي الناس جرالها ايه ؟؟ رجعني بلدنا احسن .. أنا بصراحة مش مصدق اللي باشوفه ده




إبليس يحاول يتصل من الموبيل .. الموبيل مش بينطق .. ورطة




أمين الشرطة للسائق – طلباتك يا باشا


السائق يشاور لأبوجهل – لا .. ولا حاجة .. أنا هاسيبهم عشان خاطر الشيخ ده بس .. بس يبقوا يخلوا بالهم وهم سايقين بعد كده


يمشي أبو جهل وإبليس .. إبليس هيتجنن


إبليس – حاجة تجن .. أنا ما علمتهمش كده أبدا .. نفسي اعرف مين الشيطان اللي معاه ده أشوف ازاي يعلمه المسخرة دي .. وكمان الموبيل .. لسه شاريه امبارح .. مهنج ومش عايز يشتغل .. تعال نروح نشوف ايه حكايته




يدخلوا محل الموبيلات .. محل محترم جدا .. بائعة على سنجة عشرة .. تستقبله بابتسامة ساحرة


البائعة – سباح الخييييير .. تهت أمرك


إبليس .. بغيظ – الموبيل ده أنا اشتريته من هنا امبارح .. ما بيشتغلش


البائعة تجرب الموبيل – آه .. سحيح .. ده مش بيشتغل .. ليه كده ؟؟


إبليس – هو إيه اللي ليه كده ؟؟ .. مش انتوا اللي بايعينه


البائعة – أسلي باكون موجودة السـُّبح بس .. (تغمز لابوجهل) .. بعد الدُهر ورايا شغل تاني .. هي هي هي .. استنوا زميلتي بتاعة بالليل


إبو جهل لإبليس – إيه ده يا بيسو .. هي تبع مزمزة هانم وللا إيه ؟؟


إبليس – يا اخي احنا ف إيه وللا ف إيه دلوقت .. بصي يا ست انتي .. أنا مش هاستنى لبالليل .. الموبيل ده من عندكم .. افتحيه وشوفي الشريحة .. انتي مش عارفة الأرقام اللي تبعكم ؟؟


البائعة ترتبك – لا لا ما تفتحوش .. ممكن تخسر الدَّمان


إبليس – ضمان ايه وبتاع ايه .. افتحيه ومالكيش دعوة .. مش عايز ضمان




تفتح الموبيل .. الموبيل مصدي من جوه .. وشكله مستعمل بقاله عشر سنين




إبليس – ياحرامية يا غشاشين .. الموبيل ده انا شاريه جديد .. إنتم بدلتوه في الخباثة


البائعة تردح له – باقول لك ايه ياجدع انت .. هو إيه تلاقيح الجتت ده .. انت هتتبلي عليا وللا ايه ؟؟ .. انت هتغور من هنا وللا اعمل لك محضر انك بتتهجم عليا ؟؟


إبليس – أنا جيت جنبك يا ولية انتي ؟؟


البائعة تصرخ – يالهويييييييييي .. الحقونييييييييييي . حرامييييييييييييي


إبليس وأبو جهل يجروا بره المحل .. يركبوا العربية .. ويا فكييييييييييك




إبو جهل – ههههههههه .. والله برافو عليك يا إبليس .. فعلا عامل شغل ميه ميه


إبليس – المشكلة ان انا مش قادر احصل الناس دول .. كل ما افكر في حاجة شيطانية ألاقيهم سبقوني




يوصلوا منطقة شعبية .. حالتها صعبة أوي .. بؤس وفقر ومجاري .. حاجة فظيعة




أبو جهل – يا ساتر .. ايه القرف ده .. ايه المكان ده يا إبليس ؟


إبليس – أنا ليا واحد صاحبي هنا .. واخد توكيل توزيع البانجو في البلد .. ولازم كل ما آجي اطمن عليه


أبو جهل – بس الناس دي عايشة هنا ازاي كده .. امال الحتة اللي كنا فيها امبارح كانت نضيفة أوي .. معقول دي بلد واحدة


إبليس – آه طبعا .. بس حبة فوق وحبة تحت .. مش قلت لك ان اصحابي الحرامية الكبار سرقوا البلد .. أخدوا فلوس الناس دول وسكنوا في حتت نضيفة ومحترمة ودول بقى عايشين في الفقر ده


أبو جهل – أنا باعمل كده بصراحة .. وكتير كنت باكل على الناس فلوسها .. واشغلهم بالسخرة .. واللي يتكلم يبقى يا ويله .. بس ماكنتش فاكر المسلمين برضه كده .. انت عارف ابوبكر صاحب محمد؟؟


ابليس – ابن أبي قحافة ؟؟ .. ياااااه .. انا ما باكرهش في الدنيا دي قده


أبو جهل – أهو انت عارف أبو بكر ده ؟؟ .. مرة اشترى تلات عبيد من فلوسه عشان كنا بنعذبهم عشان يكفروا بدين محمد ويرجعوا لديننا .. مع ان العبيد دول ولا هينفعهوه بحاجة


إبليس- لا اطمن .. دلوقت أنا ظبطت الناس أوي .. ماحدش بيخدم حد غير لما يكون عنده مصلحة .. عايز منه حاجة .. مافيش حاجة ابدا لوجه الله




يلمح أبوجهل مجموعة من الشباب .. لابسين تي شيرتات مكتوب عليها صناع الحياة .. واقفين وحواليهم مجموعة من الأهالي .. يقرب منهم هو وإبليس




واحد من الفريق – وياريت يا جماعة نحاول نخلص النهارده ان شاء الله .. الموضوع محتاج جهد جامد .. بس انتم شايفين الوضع صعب ازاي من غير مَيـّه


أحد الأهالي – ربنا يوفقكم يا بني .. والله أهل الحتة كلها بيدعوا لكم .. مش عارفين نشكركم ازاي


واحد من الفريق – يا حاج ما تقولش كده .. احنا محتاجين الثواب أكتر مانتم محتاجين الميه .. احنا اللي بنشكركم انكم اديتونا الفرصة دي .. والناس لبعضيها برضه


أبو جهل يقرب منهم – هو فيه إيه .. بتعملوا ايه هنا ؟؟


واحد من الفريق – إحنا يا عم الحاج جايين ندخل الميه الحلوة للمنطقة .. لإنها عشوائية والناس بتشرب ميه ملوثة .. واحنا جمعية خيرية وبنحاول نساعد الناس قد مانقدر


أبو جهل – وهتاخدوا منهم كام في الشغلانة دي ؟؟


واحد من الفريق – لا .. أهل الخير كتير .. ناس اتبرعت بالمواد .. وناس خلصت لنا الإجراءات في الحي .. واحنا هنعمل أقل حاجة .. هنوصل المواسير للبيوت


أبو جهل يبص لإبليس بغيظ – إيه يا إبليس العيال دول ؟؟ .. انت مش قلت لي انك ظبطت الناس .. وكله بالمصالح وماحدش بيخدم حد ؟؟


إبليس (بخزي) – بس بس ما تحسرنيش .. أنا عايز الأرض تنشق وتبلعني .. بس سيبك انت .. انا هاشتغل عليهم دلوقت .. هأخلي كل واحد منهم نيته تتغير .. وبدل ما بيشتغل لله يقعد يستنى نظرات الإعجاب من الناس .. يتعب بقى زي ما يتعب .. في الآخر ولا حسنة واحدة .. سيبني بس أركز


رئيس الفريق للمجموعة – طيب يا جماعة اسمحوا لي .. قبل ما نبدأ الشغل بس كل واحد يجدد نيته .. ويحتسب أجره عند الله سبحانه وتعالى .. انتم عارفين الشيطان بيجري من ابن آدم مجرى الدم .. استعيذوا بالله من الشيطان الرجيم .. ياللا توكلوا على الله




إبليس يتضاءل جدا .. يصغر .. يصغر .. يصغر من الاستعاذة بالله .. أبو جهل يبعد من المكان بأقصى سرعة وهو في قمة الغضب .. ينطلق صوت الأذان .. صوت عذب وجميل جدا




الله أكبر الله أكبر الله أكبر الله أكبر


أشهد أن لا إله إلا الله


أشهد أن محمدا رسول الله




الشباب يسيبوا اللي في إيديهم ويتجهوا أفواج للمسجد .. ابتسامة جميلة على وجوههم .. الابتسامة اللي أبو جهل بيكرهها .. وبتفكره بأصحاب محمد .. الأهالي يتجهوا للمسجد بأعداد كبيرة .. ينفجر من شدة الحسرة والغضب .. إبليس يرجع وياخده بسرعة عشان يهربوا من المكان .. يروح يلاقي مفاجأة سارة في انتظاره




العربية اتسرقت .. تلاميذه شغالين كويس .. الحمد لله .. الدنيا بخير .. هههههههه




انتظرونا في الحلقة القادمه




بقلم الكاتب/ محمد عبد السلام


*********************
ملحوظه : اي توجهات سياسيه او اراء عن اشخاص بعينها في الواقع هى تمثل فقط و جهة نظر و رأي الكاتب و ليست وبالضروره وجهة نظر المدونه


هناك 12 تعليقًا:

fnoonh يقول...

ايه ده فنونة اول تعليق

لا مش معقول

اقرا واجي

حازم النبراوي يقول...

ما شاء الله على اسلوب السرد

يا اخى فووووووق الروعة

جميلة جدااااااااااا

وفكرة انا اول مرة اقراها

تحياتى وتقديري والي الامام دوما

وحي القلم يقول...

حلو فعلا البوست ده
أسلوب حلو وربط رائع
تقبل مروري

mimi يقول...

عبد من عباد الله مدحت

جميل جدا البوست ده رااااااااائع

تحياتي

عبد من عباد الله يقول...

افنان

مستنينك لما تقري

***

حازم

يا سيدي ده انت اللي روعه
هو ده اللي عجبني فيها يا حازم و اتمنى انها تكون عجباكم برده

***

مصعب

روح ذاكر يا مصعب ههههههههههه
دي اكتر كلمه كانت بتستفذني و تدايقني و انا في ثانوي هههههه
شكراً يا مصعب و ربنا معاك ان شاء الله

***
ميمي

ممممممممممممم
هههههههههههه
شكراً يا ميمي *_^

MǿиY El-Shreef يقول...

جميله اوي ياعبد الله

بجد عجبتني اوي والجزء الاخير حسسني ان بردوا الخير والايمان موجودين

مستنيين الباقي

mimi يقول...

"وكل حاجة في آخرها آآآآآآت"
والله مش عارفة أقوللك أيه
البوست ده جااااامد جدااااااا

عبد من عباد الله يقول...

امينه

شكراً يا امينه و انا سعيد انها عجبتك و سنواصل بإذن الله

***

ميمي

هههههههههههه
افهم من كده انك مكنتيش قريتي في الاول
بس عموماً شكراً ليكي برده و بالمناسبه رسالتك اللي في التعليق الاول و صلت بس انا قاصد اني معلقش عليها يعني ههههههههههههه ^_*

mimi يقول...

في الأول قريت مش بتركيز وأخدت فكرة عامة عن البوست وعجبني جدا...
ولما قريته بتمعن فيه حاجات دخلت دماغي .. ده أنا متابعة المدونة كلها وموضوعاتك تحت الحصار
ربنا يوفقك

عبد من عباد الله يقول...

تحت الحصار مممممممممم اللهم ابعد عنا الناس الطيبين اياهم و انت اعلم بهم هههههههههههه

الله يكرم اصلك يا ستي ، ده الواحد بكلامكم ده بيطلع السما .. ( مش بيموت يعني ) ربنا يوفقك و دلوقتي احنا مش قدك خلاص انتي بقيتي صاحبه مدونه كبيره ربنا يزيد ربنا يبارك .... مش بحسد خااااالص على فكره.

Bent Men ElZman Da !! يقول...

انا عماله أقرا من الاول واقول يارب ماتنصفناش شويه عليهم كده
الحمد الله فى الاخر حسيت ان مهما كان فى ناس وحشه لكن بردو الخير موجود وفى ناس كويسه لسه مهما حصل
الاسلوب حلو اوى
تسلم ايدك

عبد من عباد الله يقول...

بنت من الزمن ده


اولاً : شكراً ليكي جداً

ثانياً : تسلم ايد الكاتب لانه ابدع في الحقيقه و انا ليس إلا مجرد ناقل

ثالثاً : " ما تنصفناش عليهم شويه كده " ....... بصراحه اتمنى اننا نكون زي ما بتقولي كده جانب الخير و الناس الكويسه و انا بطبيعتي لا احب ان اكون متشائماً و لكن ايضاً لا اريد ان اكون بعيداً عن الحقيقه و اللي اتمنى انها متكنش كده يعني ... اننا في الغالب بنبقى من الطرف التاني اللي بينتقده الكاتب بس محدش بياخد باله من نفسه .

عموماً ربنا يوفقنا و يوفقك بإذن الله و نبقى من اهل الخير