صوت المدونة

الجمعة، 6 فبراير، 2009

ثقافة الاختزال ... !

الواحد الايام دي بقى واقع في مشكله صعبه اوي يمكن الاول مكنتش حاطط ايدي عليها كويس يعني اهو فيه مشكله بس مش حاسس ايه هى بظبط هل انا من كوكب اخر ؟؟ ولا الناس هى اللي مش فاهمه و اغبياء ؟؟ و لا انا اللي غبي بجد بس مش حاسس ؟!

المشكله كلها طلعت بعيده عن الحاجات دي كلها ، قبل ما اتكلم عن تلخيص المشكله و عن فلسفتها نقول الاول ايه المشكله اللي انا برغي عليها دي ...

الموضوع و ما فيه اني لما كنت اتكلم مع اي حد في اي موضوع احس اني بقول كلام و هو بيفهمه بطريقه مختلفه خالص !! يعني على سبيل المثال اتكلمنا في الناس و احوالها و المجتمع و حاله و انا جيت قولت المشكله مثلاً ان محدش عارف الدين او محدش عارف دينه كويس إن كان مسلم و لا مسيحي الاقي اللي قدامي اتجنن !و يقولي : و ايه علاقه بس الدين بالكلام دا انا بصراحه مش معاك ما انا اعرف ناس بتصلي و دقنها قد كده و لا بتفهم في حاجه و دماغها فاضيه .. و كمان الناس كلها دلوقتي بتتكلم في الدين و الستات بقت محجبه اكتر من الاول دا حتى القنوات الدينيه بقت اكتر من اي وقت تاني يا اخي و برده البلد راجعه لورا و المجتمع متنيل على عينه .. يا عم الدين على عيني و على راسي اه لكن مش كل حاجه تقولي الدين الدين لا لا انا بصراحه مش معاك .

دا مثال من اللي بيحصل و انا في الاخر بقول انا حاسس ان فيه حلقه مفقوده انا مقصدش كدا بس مش عارف فيه ايه !! انا مقولتش ان الستات تتحجب و الناس تصلي و التربي دقنها و احنا نبقى ميه ميه و لا فراخ الست ذكيه ، انا قولت ان الناس مش عارفه الدين كويس بس هو فهم اني بتكلم عن الصلاه و الحجاب مع ان الدين مش صلاه و حجاب بس دول جزء بسيط من الدين لان الدين دا حاجه كبيره اوي الناس بتاخد فيه دراسات و علماء بيتعلموا فيه مش معقوله كل دا علشان صلاه و حجاب و دقن و بس ....

طيب بعيداً عن الدين سعات برده لما اتكلم مع حد و اجيب سيره العلم في الكلام و ازاي انه مهم و الدول على مر العصور كلها تقدمت بالعلم دا غير ان الرسول ياما اتكلم عن العلم و كدا الاقي برده ناس كتيره من اللي بتكلمني تقولي : اه اه ما هو الحمد لله الناس كلها بقت بتدخل المدارس و روح شوف كليات الطب و الهندسه و الحاجات العلميه حاجت تشرح القلب كدا لا لا العلم دا اكتر حاجه متوفره عندنا يا راجل و بعدين انا لما جيت ادور على عروسه قولت اهم حاجه في البني ادم انه يكون متعلم الحمد لله لقيتها معاها شهاده عاليه و كليه تجاره و ميه ميه و .. و ...

بعد شويه بهرش في دماغي و اقول بس انا مش قصدي كدا خالص مش هو دا اللي انا بتكلم فيه يا عم انت بتتكلم عن التعليم لكن انا بتكلم عن العلم و الله فيه فرق ...

و هكذا لما بتكلم عن الاخلاق و اتكلم عن الثقافه و المثقفين بحس اني بتكلم في حاجه واللي قدامي بيفهمها بطريقه تانيه خالص و مؤخراً بدأت اعرف افهم المشكله شويه و اعرف انها مش مشكله فرد دي مجمتع كامل عنده المشكله دي الا و هى :

ثقافة الاختزال ... يمكن الكلمه كبيره شويه او مجعلصه زي ما بنقول لكن ببساطه الاختزال هى اني حاجه كبيره اخليها حاجه صغيره و اصغرها و هى دي المشكله و هو دا اللي احنا للأسف بنعاني منه ..

اول حاجه مثلاً اتكلمت عليها موضوع الدين و التدين و الكلمات دي عموماً مشكلتها معانا ايه ؟ ان للأسف حصلها اختزال يعني صغرت عن طبيعتها الدين دلوقتي اللي الناس تعرفه و اللي احنا بنتكلم فيه و بنقيس على اساسه و نشوفه بيحل مشاكلنا و لا لأ ، هو الصلاه و الصوم و العبادات عموماً و كمان شويه sms دينيه تخادلك عليها 5000 حسنه و يتبنيلك قصرين في الجنه و ابعت اكتر تكسب اكتر و حاجات غريبه على رأي الشيخ خالد الجندي الدين بقى خربش و اكسب ، امال لما الواحد بيشوف الناس اللي في اندونيسيا و لا دول شرق اسيا ما هم برده مسلمين زينا لكن بتلاقي هناك حاجه اسمها شغل و عمل و اتقان و لما بتيجي تكلمهم يقولك دا شئ طبيعي و الدين بيقولنا كدا !! الله ؟ ليه هو انتوا دينكم ايه ؟ الاسلام .. يعني زينا برده سبحان الله امال احنا ليه متخلفين كدا يا اخويا ... ماشي ما علينا .

طيب نيجي لموضوع العلم و تعلموا العلم و لو في الصين و العلم يرفع بيوت لا عماد لها و العلم اساس كل الحضارات ، و عندنا احنا العلم يعني المدرسه و الشنطه المليانه كتب على ضهر الواد و المدرس اللي بيظبط العيال علشان يعدوا في الامتحان و بعد كدا مجموع كبير مشاء الله في الثانويه دخلك احسن كليه و الحمد لله ظبطت نفسك بملزمتين و عرفت تنجح و بقيت مهندس قد الدنيا و الحمد لله البلد بقت ميه ميه و مبقتش تفرق سينا من سونيا ... طلع الشباب كاره حاجه اسمها علم و قرف و صوره الطالب ابو نظاره اللي قاعد على الكتاب و بيكلم نفسه و المعلم ابو عصايه اللي بيهش الدبان و طبيعي اوحش حاجه نسمع عنها الدحيح و عبقرينو اللي هو برده بنضاره و شعره منكوش و بيقطع في هدومه (عبقرينو بقى) .....

اتذكر قصه كدا سمعتها عن طالب مش فاكر صومالي كان و لا من بلد تاني يعني بلد عربيه عموماً و جه هنا بعثه لكليه تجاره يتعلم المهم درس السنه الاولى و التانيه لحد ما وصل لاخر سنه و شويه و قف مع نفسه كدا و فكر و راح لاحد الدكاتره في الكليه و قاله يا دكتور انا عندي مشكله .. الدكتور قاله ايه هى ؟ قاله انا مش عارف حقولهم ايه لما ارجع ! شئ طبيعي لما حرجع لبلدي حيقولوي يلا بقى علمنا اللي انت اتعلمته و ادينا العلم اللي انت اخدته .. بس انا لحد دلوقتي مش عارف ايه العلم اللي انا اخدته رغم اني في اخر سنه بس انا كنت بشتري الكتب و اشتريت ملازم زي الطلبه هنا بيشتروا و بيقولوا بيجي منها الامتحان و الحمد لله جه فعلاً منها الامتحان و حليت و عديت لكن تلات سنين على كدا بعدي في الامتحانات و مش حاسس اني باخد حاجه حقيقي مش عارف انا حقولهم ايه لما اجرع اقولهم انا اتعلمت ازاي اعدي في الامتحانات و اخد الشهاده !!

فعلاً انت اتعلمت ازاي تعدي في الامتحانات زي ما كلنا الحمد لله اتعلمنا ازاي نعدي و نركز على اللي حيجي في الامتحان و نشوف الدكتور عايز ايه و بعدين يا سيدي خد الشهاده الاول و ابقي شوف بقى انت عايز تعمل ايه .. يعني اضيع 20 سنه من عمر علشان اخد حته ورقه اسمها شهاده و في الاخر يقولوي انت مش نافع للشغل لانك مش متعلم كويس و وسط الدول كلنا بتضحكوا على نفسكم بحاجه اسمها شهاده و تعليم عالي .. عفواً انه الاختزال .

العلم اللي اروح له لحد الصين ، العلم اللي فيه ناس افنت حياته فيه ، العلم اللي بيرفع البيوت و الدول ، العلم اللي بيقوي البني ادم و يخليه ليه مكانه عاليه ... مش هو العلم بتاعنا دا ! اظن انه فيه علم تاني احنا ما نعرفهوش .

اخيراً اتمنى ان الواحد فينا يتعب شويه و يبعد عن ثقافه الاختزال و الاستسهال اياً كان في العلم و لا الدين و لا الاخلاق الكويسه اللي انحصرت بس في عدم الشتميه مثلاً ، ونشتغل على نفسنا شويه علشان نبقى في حال احسن من اللي احنا فيه .

"هل يستوي الذين يعلمون والذين لا يعلمون "
ــ ــ ــ ــ ــ ــ ــ ــ ــ ــ
معلش انا اسف على التأخير في البوستات و انا عارف ان الكلمه دي للأسف بقيت بقولها كتير بس عموماً لو حد فهم حاجه من اللي انا كتبته فوق دا يبقى يقولي ... اشوفكم على خير .