صوت المدونة

الأربعاء، 24 يونيو 2009

الحلقة الرابعة ..... ابوجهل 2009





سبنا أبو جهل وإبليس وهم دايخين في الشارع بعد ما عربية إبليس اتسرقت .. إبليس هيتجنن لإنه مش عارف يتصرف أو يتصل بأصحابه لإن الموبيل عطلان .. أبوجهل مابين انه فرحان جدا بأخلاق المسلمين البايظة .. وبين انه متضايق عشان حركة العربية


إبليس مش عارف يتصرف .. الشباب حسوا ان فيه مشكلة .. توجهوا لمساعدتهم




واحد (يوجه الحديث لأبو جهل) – خير ان شاء الله يا حاج .. فيه حاجة ؟؟


أبوجهل – العربية اتسرقت .. أنا مش عارف ايه اللي بيحصل في البلد دي


واحد ( يحس بلكنة غريبة في كلام أبو جهل .. يفتكره سايح ) – لامؤاخذة يا حاج والله .. حاجة تكسف .. حضرتك بس اتفضل معانا نصلي سوا .. ونحاول نتصرف بعد الصلاة ان شاء الله .. اتفضل اتفضل


بقية الشباب – أيوه .. نصلي سوا وربنا يحلها ان شاء الله


أبو جهل ( يبص لإبليس ) – لأ .. أصل .. يعنيييييييي


إبليس يختفي فجأة .. فص ملح وداب .. وأبو جهل يلاقي نفسه مدفوع دفعا للجامع .. يدخل مع الشباب .. ويروح على الحمام فرارا من الصلاة .. لحد ما الصلاة تخلص


واحد من الشباب .. يسلم على أبو جهل بعد الصلاة – تقبل الله يا حاج .. أمال فين الأستاذ اللي كان مع حضرتك ؟؟


أبو جهل – ده صلى وطلع على طول بعد الصلاة .. موضوع العربية شاغله أوي


واحد تاني – ولا يهمك .. إن شاء الله نتصرف .. ياللا بينا


أبو جهل يدور على حذائه .. يدور .. يدور .. يدور .. حزروووووووووا حصل إيه .. أيوه بالضبط كده .. مع الأسف الشديد .. جزمته اتسرقت .. إخص على كده


أبو جهل – إيه يابني ده .. معقول الجزمة تتسرق في الجامع ؟؟ .. معقول ؟؟ هم المسلمين دلوقت بقوا كلهم كده ؟؟




الشباب في نص هدومهم .. واحد منهم يتطوع بحذائه عشان الراجل الغريب


معلش والله يا حاج .. مش عارفين نقولك ايه .. للأسف بعض الناس بتسيء للإسلام جدا .. ربنا ينتقم منهم .. اتفضل حضرتك .. البس الجزمة دي وان شاء الله تطلع على مقاسك




أبو جهل ياخد الحذاء وهو مضطر .. يلبسه ويطلع .. ياخد إبليس على جنب ويمسك فيه




أبو جهل – وكمان يسرقوا جزمتي .. لااااااا .. ده انت زودتها أوي


إبليس – معلش .. جت فيك يا عمور .. أصل جزمتك غالية .. لقطة بقى .. هههههههه .. انت عارف .. أنا حرّمت ناس كتير أوي يخشوا الجوامع بسبب المواضيع دي .. واللي بيصلي مابقاش عارف يركز في الصلاة وللا يبص على الجزمة


أبو جهل – المهم .. هنعمل إيه دلوقت في موضوع العربية


إبليس – أمرنا لله بقى .. نشوف الشباب دول يساعدونا


يوجه كلامه للشباب – نروح نبلغ البوليس .. وللا نعمل ايه في موضوع العربية ده ؟؟


واحد من أهل المنطقة – إزاي بقى .. ده انتم ضيوفنا .. سيبنا احنا نتصرف ونجيب العيال اللي سرقوا العربية دول من تحت الأرض


شوية كده .. ويظهر واحد معلم كبير من أهل المنطقة .. ومعاه عيلين .. ينزل فيهم ضرب




المعلم – فين ياد انت وهو الوله زقزوق


ولد منهم – آآآآي .. والله ما عرف يا معلم .. آآآآآآآآآي .. قفايا ورم حرام عليك


المعلم – اوع تكون فاكر نفسك عند الحكومة وهنطبطب عليك .. ده انا هاعلقك هنا لو ما جبتليش الواد ده في ساعة تاريخه


الولد – آآآآآىي .. حاضر يا معلم .. هاجيبه .. هاجيبه




إبليس لإبو جهل – يا نهار اسود .. زقزوق ؟؟


إبو جهل – انت تعرفه ؟


إبليس – أيوه .. ماهو ده صاحبي اللي كنت جاي له


أبو جهل – أيوه .. كده صح .. ماهو انت هتعرف مين غيره ؟؟ .. بس برافو عليك .. عرفت تربي


أبليس – أربي .. ده انا هاديله جـِـزا .. مالقاش غير عربيتي يسرقها


إبو جهل – عشان تحرم تسلط اصحابك على جزمتي


شوية كده وتظهر العربية .. والمعلم الكبير يعتذر لإبليس




المعلم – لا مؤاخذة ياباشا .. عربية سعادتك سليمة اهي .. والواد زقزوق تاويناه .. وآخر مرة ياباشا


إبليس – شكرا يا معلم .. أنا مش عارف من غيرك كنت هاعمل ايه




ينطلق إبليس وأبو جهل بالعربية .. فجأة أبو جهل يحس بآلام شديدة في بطنه




أبو جهل – بطني .. آآآآآآه .. إلحقني يا إبليس .. مغص جامد أوي


إبليس – سلامتك يا أبا الحكم .. مالك .. فيه إيه ؟؟


أبو جهل – سكاكين بتقطع في بطني .. ألم رهيب


إبليس – طيب .. نطلع على المستشفى حالا


يطلعوا على مستشفى خاص جدا .. جدا .. جدا .. واستثماري جدا .. جدا .. جدا


يدخلوا المستشفى .. الممرضات في الاستقبال يلمحوا شكل أبو جهل .. باين طبعا انه سايح .. كله يقوم يعرض خدماته


مناظر الممرضات في الاستقبال خلت أبو جهل ينسى اللي هو فيه .. أشد من أي مسكن آلام .. بقى ماشي عينيه في وسط راسه


أبو جهل لإبليس – ايه ده يا إبليس .. انت متأكد ان احنا في مستشفى مش في زأططة


إبليس – وطي صوتك ماتفضحناش .. هو الطب الحديث كده .. العلاج من أول نظرة


أبو جهل – بقى كده .. والله انت ميه ميه .. طب خلينا نشوف شغلنا احسن أنا حاسس ان روحي هتطلع


يتجهوا للدكتور .. إبليس يشرح له الموقف .. الدكتور يأمر بتحويل أبو جهل عشان يعمل رسم قلب




إبليس – رسم قلب إيه يا دكتور .. الراجل بطنه واجعاه .. مش قلبه


الدكتور – انت هتعلمني شغلي . ما تيجي تكشف انت وبلاش انا .. لو سمحت اتفضل انت بره .. يا سوسو .. خدي الأستاذ عشان رسم القلب


سوسو لأبو جهل – اتفدّل يا أستاذ .. بسيتة خالس .. جاست فايف مينيتس


يمشي معاها أبو جهل زي المسحور .. معقول سوسو دي هي اللي هتعمل له رسم القلب .. ايه الهنا ده .. رسم قلب رسم قلب .. بس نعيش


تدخل سوسو وأبو جهل غرفة رسم القلب .. أبو جهل ينام على السرير .. يغمض عينيه وهو في قمة السعادة


سوسو تنادي على زميلتها – يا حفيظة .. حفيظة .. تعالى عشان تعملي رسم القلب للأستاذ


تلتفت لأبو جهل بابتسامة رائعة – سوري سير .. سي يو


وفي لحظة يلاقي أبو جهل نفسه مع الست حفيظة الحكيمة .. ذات السبعين ربيعا .. تقبض عليه بإحكام وتلف حوالية أسلاك الجهاز .. يفقد أبو جهل النطق .. والسمع .. والبصر .. ويروح في غيبوبة عميقة


يفيق على إيد خشنة تهزه بعنف - خلاص يا حاج .. اتفضل قوم


أبو جهل ( فزعا ) – فيه إيه .. فيه إيه ؟؟


حفيظة – اتفضل على الانتظار .. رسم القلب خلص


يطلع أبو جهل .. يلاقي الدكتور بيتكلم مع إبليس .. وإبليس مكشر خالص


الدكتور – زي ما بقول لك كده .. ورم في الكلية اليسرى .. لازم تتشال حالا


إبليس – كده ؟؟ .. يشيل الكلية مرة واحدة ؟؟


الدكتور – اطمن خالص ..هو حالته خطيرة .. بس الموضوع أندر كونترول .. ما تقلقش خالص سعادتك .. هو البيه هيدفع بالدولار وللا بالمصري


إبليس – اللي تشوفه سيادتك .. بس الله يخليك .. الراجل ده أمانة في رقبتي .. ولازم أرجعه لأهله صاغ سليم


الدكتور – لا .. لا .. اطمن خالص .. العملية مش هتاخد كتير




ابليس يقعد في الانتظار .. وأبو جهل في غرفة العمليات .. شوية كده وييجي له واحد .. شكله مش غريب .. إبليس شافه فين .. فين .. مش فاكر




الواحد – لامؤاخذة .. مش سعادتك برضه الأستاذ إبليس


إبليس – أيو ه يا بني .. انت تعرفني ؟


الواحد – أيوه .. أنا شيطان من شياطين الإنس .. باشتغل هنا .. اتشرفنا يا فندم


إبليس – أهلا وسهلا .. طيب ياريت توصي الناس اللي هنا عليا .. احسن معايا ضيف هنا وبيعمل عملية


الواحد – ما هو انا جاي لك عشان كده


إبليس – عشان كده .. ليه ؟؟


الواحد – الحكاية بصراحة إن صاحبك سليم .. وما عندوش حاجة .. هو بس صباعه كان مدوحس


إبليس – أمال ايه حكاية الكلية والعملية .. إيه الحكاية ؟


الواحد – حوارات كلها من الآخر كده .. الدكتور ده متفق مع واحد عايز يعمل زرع كلية وهيسرق كلية صاحبك ويبيعهاله بخمسين ألف جنيه .. لولا اني شفتك وعرفت انه صاحبك كنت سبته يسرقه .. ماهو انا اللي باظبط له الحاجات دي .. تربيتك يا باشا


إبليس – الله يخرب بيوتكو .. يا مجرمين .. يا نصابين .. يا فجرة




يقوم إبليس ويخبط على الدكتور .. يطلع الدكتور .. إبليس يمسك فيه .. ويخشوا في حوارات طويلة لحد ما يسيب أبو جهل .. مقابل انه يدفع تمن الكشف ورسم القلب وأجرة طبيب التخدير وحجرين معسل عشان يعدل مزاج الدكتور .. بسيطة خالص عشر تلاف جنيه بس .. يدفعهم إبليس وهو صاغر .. تلاميذه بقى .. هيكسفهم ؟؟


يطلعوا بره المستشفى .. إبليس يحكي لأبو جهل الحكاية .. أبو جهل يموت على نفسه من الضحك .. ويسأل إبليس




أبو جهل – بس قوللي .. الجماعة دول مسلمين برضه ؟


إبليس – أيوه .. ماهم كاتبين في مدخل المستشفى .. لا إله إلا الله


أبوجهل – آه .. آه .. مادام مكتوب عليها .. يبقوا أكيد مسلمين


إبليس – طيب أنا بقى هانسيك كل القرف اللي شفته اليومين دول .. وهاعيشك في جو ميه ميه .. هتنسى نفسك


أبوجهل – آه .. تعال نروح زأططة .. انت مش قلت لي هاخليك تلعب ؟؟


إبليس – لا ياراجل .. زأططة إيه وبتاع ايه .. احنا هنروح نسهر النهارده سهرة حكاية .. البلد كلها بتسهر اليوم ده .. بمناسبة الكريسماس


إبو جهل – الكريسماس .. بس ده مش عيد المسلمين


إبليس – وماله .. بس أنا علمتهم يحتفلوا بيه كل سنة .. لغاية ما بقت عادة عندهم .. ويشربوا ويرقصوا .. وووووو يهيسوا


أبو جهل – لا لا ياراجل .. معقول ؟


إبليس – طب انت هتشوف بنفسك .. أدي احنا وصلنا أهو




يدخلوا قاعة الاحتفال .. فندق عشر نجوم .. كل نجم انقح من اللي جنبه .. نجوم ايه بقى .. ولا نجوم هوليود .. أبو جهل يفرك عينيه بشدة .. أنا في حلم وللا في علم .. رقص وهيصة وسكر ومسخرة .. مش ممكن .. مش ممكن .. أبو جهل شرِب وهيّص ورَقَص .. وفجأة .. النور انطفى .. وبدأ يسمع همهمات غريبة حواليه




أبو جهل – إيه ده يا إبليس .. كبسة دي وللا إيه ؟


أبليس – لا .. دي بقى أحلى لحظة في الليلة كلها .. النور بينطفي وكل واحد هو ونصيبه


أبو جهل – يعني إيه هو ونصيبه


إبليس – دلوقت تشوف




فجأة أبو جهل لقى إيدين رقيقة تتلف حوالين رقبته .. وواحدة بتكلمه بهمسات حالمة .. دارت رأسه .. وكان هيقع على الأرض لولا إنه وقع بين إيديها .. استرخى وهو بيحلم أحلام سعيدة جدا .. ياترى دي كانت الشقرا اللي جنبه .. وللا اللي لابسة فستان ازرق ؟؟


وفجأة .. رجع النور .. ابتسم ابتسامة رقيقة .. وفتح عينيه عشان يشوف هو بين إيدين مين .. يا سلاااااااااااااام .. مين ؟؟ .. حفيظااااااااااااااا .. لااااااااااااء .. الحقونيييييييييي .. هي حفيظة بتاعة مستشفى الحرامية .. الله يخرب بيتك يا إبليس الـ ...... جري من بين إيديها فزعا .. وخد إبليس وطلعوا جري


الجرسون مستنيهم على الباب – الحساب يا حضرات


إبليس – معلش يا بو جهل حاسب انت عشان صرفت الكاش اللي معايا في المستشفى


إبو جهل – أوي أوي


يمد إيده في جيبه .. المحفظة .. المحفظة .. المحفظاااااا .. اتسرقت يا إبليس .. اتنشلت .. كده برضه يا حفيظة .. وآدي آخرة اللي يمشى ورا الشيطان


هيتبع .. مش هيتبع .. هيتبع .. مش هيتبع .. ههههههههه .. تحياتي




بقلم الكاتب/ محمد عبد السلام


*********************


ملحوظه : اي توجهات سياسيه او اراء عن اشخاص بعينها في الواقع هى تمثل فقط و جهة نظر و رأي الكاتب و ليست وبالضروره وجهة نظر المدونه

هناك 8 تعليقات:

Ramy Wasel يقول...

اي توجهات سياسيه او اراء عن اشخاص بعينها في الواقع هى تمثل فقط و جهة نظر و رأي الكاتب و ليست وبالضروره وجهة نظر المدونه

يا راااااااجل

دى بتنطق سياسه
وكان تاقص يكملها بقصيده على سلامه

ابليس امام السفاره
وابليس على باب المطار

مامة مازن يقول...

السلام عليكم ورحمة الله وبركاته
اخى عبد من عباد الله اول تعليق لى هنا رغم انى قرات لحضرتك كذا موضوع ماشاء الله عليك
حلوة جدا السلسلة دى وهقراها كلها ان شاء الله
ربنا يوفقك

سمسمه يقول...

بجد جميله وهايله ... وللأسف حقيقه وواقع

فى إنتظار البقيه أخى الكريم

تحياتى

عبد من عباد الله يقول...

رامي

ما هو علشان هى فيها بعض الحاجات السياسيه و زي ما انت بتقول بتنطق سياسه ، انا كتبت الملحوظه دي .

****

مامة مازن

حقيقي بجد انا اتشرفت بزياره حضرتك ليا ، و اتمنى ان تكون المدونة نالت ولو على جزء من اعجابك ، و بخصوص السلسله ربنا يوفق و اقدر اكملها ان شاء الله ... مره تانيه بجد شرفتيني .

****

سمسمه

شكراً يا سمسمه ، كفايه انك شرفتيني حقيقي ، ربما تكون السلسله تنقد كثير من السلبيات و لكنها في وجهة نظري دائماً ما تأكد على ان هناك ضوء يؤدي إلى الامل .

shemo يقول...

السلام عليكم......
ازى حضرتك اول مرة ازور واعلق عندك بس بجد الحلقة جامدة جدا حتابع لو فى حلقات تانية ان شاء الله وحتتكرر الزيارة ........دومت بخير فى رعاية الله.
shemo

حبيبه سى السيد يقول...

تحفة فنية

جميلة جدا وبما ان مش انت اللى كاتبها يبقى تسلم ايد اللى كتبها

وتسلم ايدك لانك نقلتهالنا

انا لاقيت نفسى بجيب اول حلقة واقرهاهم كلهم

ربنا يحفظنا من ابليس وشياطين الانس
ويحفظ كل المسلمين

قول امين

تحياتى

عبد من عباد الله يقول...

shemo

طيب انا كده اتشرفت بزيارتك و الله ، اما بخصوص الحلقه بالكاتب ابدع في كتاباته و ده اللي خلاني انقل السلسله دي ، و اتمنى انك تزورينا تاني ان شاء الله .... تحياتي

****

حبيبه سى السيد

آآآآآميييييييييييييييين

و اكيد تسلم ايده و بما اني مش انا اللي كاتبها يبقى من المفترض اني ما اردش على اعجابك ده خالص لانه موجه للكاتب هههههههه ... عموماً اتمنى انها تكون عجبتك فعلاً و اعطتك استفاده ولو بسيطه حتى ... و بإذن الله الحلقات القادمه تكون احسن و احسن .

****

اسف يا جماعه الفتره دي عندي مشاكل كتيره شويه و اتمنى ان ربنا يعديها على خير ان شاء الله و ححاول اكتب في اقرب وقت او حتى انقل ... اشوفكم على خير

وفاء بركات يقول...

ياقوة الله علي ده بوست جامد جامد طحن
انا فرحانه في إبليس علشان داق من شر صنعه وأبوجهل إتمرمرط ...
بس زعلانه من البشر قوى علشان المتاجره بإسم الدين , يغور تلاميذ إبليس بأفعالهم اللي الدين منها براء .
إنشاء الله سوف أكمل بقيت الحلقات
تمنياتي بالتوفيق