واحد.. واحد.. اتنين.. اتنين .......

تلاته.. تلاته.... الله ..الله ..الله.. التليفون شغال ؟ ... قصدي الميكروفون شغال ؟ شغال يا ابني ؟ طيب بسم الله ولا إله إلا الله فراشه الحج محمد ال......( ايه مفراشه الحج محمد دي؟!! ) معلش اصل دا اول بلوج ليا ومعنديش خبره بصراحه كدا وانتوا عارفين ان الدنيا ملهاش امان واللي فيجيبك بركه يبقى لغيرك ( مش عارف ايه لازمه الحته دي ) ما علينا دي المدونه بتاعت العبد لله وممكن تلاقي فيها اي حاجه حكايات تلاقي اخبار تلاقي سياسه تلاقي بطاطس ..كرمب ..عنب و اي حاجه باتنين جنيه ونص و حياتك وما حتلاقي حاجه زي كدا في السوق لـــ........... ( عفواً عطل فني الإرسال انتقل إلى إذاعه سوق الخضار ) .

نرجوا من زائري المدونه الإلتزام بالقواعد والتي تنص على :

1/ مسح الجزمه قبل ما تدخل... ( معلش جديده بقى و لسه ماسحين) يا ريت ترميها احسن تبقى عملت خير
2/ سيب كل متعلقاتك في الصندوق اللي جنب باب المدونه من موبايل و ساعه و محفظه وبإذن الله مش حتلاقيهم
3/ ممنوع اصطحاب الاطفال او الشيوخ او النساء او الرجال او الشباب ( متسألنيش مين اللي حيدخل بقى )

طبعاً دي قواعد نص كم و براحتك يا عم واعمل اي حاجه بس انت ادخل ..برجلك اليمين الشمال ان شاء الله تنط حتى عايز تدخل برعبيه اتفضل و حتلاقي ركنه جوه متر في متر متخفش مطاطه وبتشيل و لكن نحن لسنا مسؤولون عن حمايه متعلقاتك ولازم تكون واثق يعني برده . ........ ايوه تكون واثق انها حتتسرق اكيد لا مفر يا باشا ... نبدأ الكلام المهم في المرات القادمه بإذن الله ........والله المستعان .