حسبي الله ونعم الوكيل !!

اقرب كلمة يقولها رجل متضرر مما حدث في إضراب 6 ابريل .... للأسف حدث ما كنت اخشاه ، قالوا اضراب ولو بتحب الوطن اضرب ولو عايز الحال يتصلح ولو نفسك البلد تتغير و و و ....... اخاف من اللعب على وتر العاطفه والحماسه و الناس تعبت من الغلاء و ضيق المعيشه فعلاً بيخلي الدماغ في حالت شلل عن التفكير و بصراحه المرتبات عايزة اجتماع لكل علماء الإقتصاد في العالم علشان تعرف ازاي المواطن يعيش بيها واعتقد انهم حيطلعوا من الإجتماع على مستشفى الامراض العقليه .

اظن الناس شافت اللي حصل في المحله شئ لا يرضي اي انسان ولا كأننا كلنا مصريين ناس تحرق وناس تضرب و العسكري الغلبان اللي طالع بالامر دا يضرب و اصحاب المحلات اللي اتكسرت راجل رايح شغله ولا حتى معدي في الشارع لما يضرب ولا تتكسر رجله ولا يموت يعني اقل كلمه حتطلع من الناس دي ... حراااام حرااااااااام .

طيب و بعدين يعني ما نعملش اضراب يعني الحكومة تبهدل فينا وما نقولش لأ كمان .. مش قصدي كدا طبعاً بس كل اللي شاف اللي حصل في المحلة مجمع على ان دا شئ فظيع لا يرضي عدو ولا حبيب .... بس يمكن ليا وجهة نظر ناس كتيره اوي مش حتعجبها او حتدايق مني الفكره كلها انك لما تيجي تسأل اي حد من الشعب حيقولك " خلاص بقى زهقنا عايزين تغير مش قادرين نستحمل اكتر من كدا " وانا معاه فعلاً الحكايه زادت اوي بس يمكن اختلافي معاه او مع غيره في طريقه الحل ...

فهو ممكن يكون عنده طرق كتيره للحل ولكن كلها تصب في فكره واحده ان التغير لازم يجي من فوق لازم اللي فوق يتغير علشان البلد حالها ينصلح وانا مش مختلف اوي معاه في الحته دي لازم اللي فوق يتغير بس مختلف ان مش لازم هو الاول اللي يتغير شايف ان التغيير لازم يجي من تحت من الشعب نفسه .. طبعاً دي كلمه كبيره اوي يعني ايه من الشعب نفسه ! يعني الشعب دا يلم نفسه كدا في ميدان و يقول هيييييه انا الشعب حتغير !!

لأ بس الفكره ببساطه ان لو احنا مجموعه من الناس ( طلبه ولا عيله ولا سكان في بيت واحد ) وجه واحد اشتغل معانا و اديناله فلوس وبدأنا نشتغل ومره واحده بقى يسرقنا وياخد فلوسنا قولنا نروح ناخد فلوسنا منه ، معرفناش ناخد حاجه طلع راجل مسنود ومش عارفين ناخد منه حق ولا باطل طيب وبعدين حنعمل ايه .. ( هنا الاختلاف ) زمان كنا نقف مع بعض كلنا في محنه واحده ولازم نساعد بعض و نشوف مين مننا اتاخد منه فلوس كتير ونحاول نقف جنبه لو انا معايا عشره جنيه و التاني ابنه بيعيط عايز حاجه كنت اديله تلاته ولا اربعه ولا حتى خمسه جنيه ، كان التكافل والتكاتف دا بيخفف من حده المشكله و ربنا بيوقف معانا و لو سألت اي حد عن زمان تلاقيه يقولك

" يا ابني زمان كانت الفلوس اقل من كدا بكتير ومكانتش الحاجات متوفره زي دلوقتي المعيشه دلوقتي بقت اسهل والفلوس كترت بس بيني وبينك الناس هى اللي اتغيرت مبقاش حد بيبتسم للتاني صدقه زمان كان الواحد تعبان اليوم كله بس بليل بينام مرتاح لا ظالم حد ولا حد مدايق منه لكن دلوقتي ربنا اعلم بالحال "

طيب دا كان زمان لكن دلوقتي لو الراجل دا نصب علينا ومعرفناش ناخد حقنا للأسف بننصب على بعض وبكل بساطه لو سألت حد فينا ليه بتنصب ؟! حيقولك " اصل الراجل دا نصب عليا وخد فلوسي يعني اعيش ازاي " تبصله انت .. طيب دا سرقك مالك انت بقى بالراجل دا هو عملك حاجه دا مسروق زيك ومنصوب عليه " .... طيب و انا جبت الكلام دا منين ؟!! من الشارع من الناس هو دا حالنا و دلوقتي حترجمه للي بيحصل بظبط ....

اللي فوق بيسرقونا واحنا بنسرق في بعض .. فتنزل الصبح تروح اي مصلحه حكوميه علشان تخلص ورقك تلاقي صاحبنا يقولك معلش فتح مخك معانا يا باشا طبعاً تفهم انت وطلع علطول بس قلبك من جوه بيدعي عليه تخلص من دا تروح لواحد تاني يقولك بإبتسامه عريضه معلش حق الشاي يا فندم كل دا وانت بتطلع من جيبك و تخلص الورق تروح تشتكي للحي يقولك علشان تقدم الشكوى لازم كذا وكذا من الاخر فك الكيس علشان ما نلعبش معاك خلاويس وبعد ما ترجع البيت تبقى عمال تقول في نفسك يعني انا الاقيها من المرتب ولا من الناس اللي عماله تاخد في فلوسي و كمان علشان اخد حقي مش اكتر .. ( عارف المشكله في ايه ؟ ) انك بعد ما تفكر تروح رايح شغلك اللي هو مصلحه حكوميه برده و تطلع كل اللي اتعمل فيك في الناس وتاخد من دا وتاخد من دا ... مش بقولك بنسرق بعض .

وبعدين لما تيجي برده تسأل حد ليه بتعمل كدا ؟ يقولك نفس الإجابه اللي اتقالت فوق " يعني انت مش شايف الدنيا بقت غاليه ازاي و المرتب مش مقضي طيب احسبهالي انت ازي اربي ازاي اكل ازاي اعلم ...." طيب ما انت اللي بتنصب عليه دا زيك كدا برده يا عم الحج مهواش من البشوات ولا مليونير يعني برده مرتبه زي وعايز يربي ويعلم و يأكل بس المشكله انك حتاخد رزقك هو هو بالسرقه من غير سرقه رزقك هو هو بس الفرق انه كدا حيبقى حرام ومفيهوش بركه .

اسف اني طولت شويه بس كان عندي وجهة نظر يا رب اكون عرفت اوصلها .... والله المستعان .