صوت المدونة

الأحد، 18 أكتوبر 2009

الحلقة السابعه ..... ابوجهل 2009


إبليس اخد أبو جهل في جولة داخل البلد .. وفي طريقهم لقوا مجموعة كبيرة من الشباب والبنات عند محطة القطار .. كل واحد واقف مع واحدة .. وشكلهم كده بيستعدوا للسفر .. وهات يا هزار وضحك .. وزغزغة .. آخر روشنة .



أبو جهل – إيه دول يا إبليس .. مسلمين دول ؟؟

إبليس – آه طبعا مسلمين .. مش باين عليهم وللا إيه ؟

ابو جهل – بصراحة مش عارف .. ما هي بقت حاجة تلخبط .. مش هاخد بالشكل بعد كده

ابليس – دول بقى طالعين رحلة .. هيسافروا مع بعض أسبوع .. أحلى شغل باعمله معاهم في الأسبوع ده .. اتفرج عليهم لما يوصلوا هناك بقى .. وينزلوا جولات سياحية .. وكل واحد يختفي مع واحدة تحت الشجر يا وهيبة .. وانا تالتهم طبعا

أبو جهل – قشطة عليك يا بيسو .. أهي دي ضربة معلم .. بس معقول أهاليهم بيسيبوهم يسافروا مع بعض كده عادي ؟؟ .. ما عندهمش نخوة دول وللا إيه .. ده انا ما كنتش اسيب بنتي تخرج مع حد غريب ابدا .. انا هاروح اتأكد من الكلام ده

إبليس – هتعمل ايه يا مجنون ؟؟

أبو جهل – هاروح اكلمهم .. واكلم أهاليهم .. أشوف فعلا بيعملوا كده وللا لأ ؟؟

إبليس – يابني هتضحك الناس عليك

ابو جهل – ما هو أصله كلام ما يخشش النافوخ .. سيبني يا عم



يروح لولد وبنت واقفين مع بعض .. الولد عمال يزغزغها .. والبنت قاعدة تضحك بصوت عالي



أبو جهل – انت يا أستاذ

الولد – نعم ؟؟ .. انت بتكلمني ؟؟

أبو جهل – أيوه .. ممكن أعرف بتعملوا إيه ؟؟

الولد ( باستهزاء ) – وانت مالك ؟؟

أبو جهل – معلش يابني .. انا غريب مش من هنا .. بس شفت شكلكم كده حبيت اعرف ايه اللي بيحصل

الولد – مافيش .. دي صاحبتي .. وطالعين رحلة كام يوم كده مع الجروب في الكلية

أبو جهل – كام يوم ؟؟ .. يعني معقول البنات دول هيباتوا بره بيوتهم معاكم كام يوم ؟؟

الولد – قصدك ايه يا أستاذ ؟؟ .. احنا شباب محترمين جدا وولاد ناس .. والبنات اللي معانا زي اخواتنا بالضبط .. اوع تفكيرك يروح لبعيد

أبو جهل – لا والله عداكم العيب .. بس انا شايف ان هزاركم مع بعض غريب شوية

البنت – مافيهاش حاجة يا أونكل .. احنا زملا .. ومافيش بيننا غير كل احترام .. فيها ايه لما يزغزغني .. ده حتى توتو روش وكووول أوي

ابو جهل – واسمك توتو ؟؟

الوله – اسمي توفيق .. توتو اسم الدلع

ابو جهل – ربنا يخليك لماما يا توتو .. عيشوا ياولاد .. خدوا راحتكم خالص .. تيك يور تايم

البنت – ميرسي أوي يا عمو



أبو جهل يتجه لأحد الآباء .. جاي يوصل بنته .. وواقف معاها هي وبقية الشلة



أبوجهل – لامؤاخذة حضرتك بنتك طالعة الرحلة ؟؟

الأب – أيوه .. أهلا وسهلا .. حضرتك والد واحدة من اللي معانا ؟؟

أبو جهل – لا والله .. انا بس كنت مستغرب انك سايب بنتك تسافر أسبوع كده مع شباب أغراب كده

الأب – المجرمة ؟؟ .. هي طالعة مع أغراب ؟؟ .. ما قالتليش كده ؟؟

أبو جهل – أمال مين اللي طالعين معاها دول ؟؟

الأب – آآآآآآه .. ياراجل خضيتني .. قصدك توتو والشلة .. دول زمايلها في الكلية .. أنا بنتي ما تخرجش مع حد غريب أبدا .. لكن زمايلها دول زي اخواتها بالضبط

أبو جهل – آه آه .. صح كده .. لا مؤاخذة أنا كنت فاكرهم أغراب

الأب – لا يا أستاذ احنا عيلة محترمة جدا ومش بتوع كلام من ده



أبو جهل يتجه لإبليس ..



ابليس – صدقت بقى .. جبت لنفسك الكلام بس

ابو جهل – معقول اللي بيحصل ده يا إبليس .. ده الراجل واثق أوي من نفسه .. وسايب الواد يزغزغ بنته كده .. وكمان الواد قد الشحط واسمه توتو .. انا كنت عايز اهفه قلمين على وشه .. بس قلت بلاش ابوظ شغلك

ابليس – ههههههه .. تحب تركب معاهم القطر .. اتفرج اول ما القطر يمشي هيحصل ايه

أبو جهل – هيحصل ايه ؟؟

إبليس – استنى وانت تشوف



أبو جهل وإبليس يركبوا معاهم القطر .. أول ما ركبوا كل واحد قعد جنب واحدة .. ما فيش واحد غلط وقعد جنب واحد أبدا .. يمكن عيب ؟؟ الله أعلم



شوية كده وقعدوا يغنوا .. والطبلة والرق طلعوا .. طبلة انما ايه ؟؟ حاجة ترقص القطر نفسه .. بنتين اتحزموا وقعدوا يرقصوا .. والقطر اتقلب مسخرة .. والبنات أصروا يحزموا توتو ونزل يرقص معاهم .. والكل بيغني



الحب نص نص

والكلمة هس هس

قلت لها باحبك انتي

قالت لي حبك برص

برص

برص

برص

وهيييييييييييييييييييييييييييه



ابو جهل – اخص على ده كلام .. فيه حد بيغني لواحدة يقول لها حبك برص .. ايه يا عم ده

ابليس – ده الشعر الحديث .. اللون اللي بيعجب الشباب ويرقص البنات .. شغل اخوك ابليس فروم ايه تو زد

ابو جهل – شعر ؟؟ .. ده شعر ده ؟؟ لاااااااا .. ده انت زودتها أوي .. نزلني يا عم انت .. انا اتخنقت .. نزلني

ابليس – طيب .. طيب .. بس امسك نفسك عشان هنطير



يطير ابليس وابوجهل .. هربا من المسخرة الشديدة اللي في القطر .. وتوتو وعصابة بوبي الحبوب

رجع أبو جهل وإبليس الفندق .. لفت نظر أبوجهل تجمع من الناس بيتفرجوا على التليفزيون في إحدى القاعات .. ابو جهل قال بس .. أكيد فيه فيديو كليب ميه ميه .. نلحق نشوف لنا حتة كده وللا كده .. راح جري يشوف .. لقى الناس بتتفرج على فريق صناع الحياة في ندوة من ندواتهم في الحج .. والحاضرين بيعرضوا مشاريعهم وطموحاتهم للنهضة .. تجمع جميل .. والحماس في عيون الجميع .. وكلمات الاستحسان من بعض الحاضرين



أحد الحجاج بيتكلم في الندوة – وان شاء الله المشروع ده ممكن في خلال سنة واحدة يوجد فرص عمل لخمسة آلاف شاب على الأقل .. وهيخدم مشروع النهضة ويحقق أهدافنا لخدمة الإسلام والمسلمين



حاج آخر – وانا على استعداد لتمويل المشروع .. وايدي في ايدكم وربنا يتقبل مننا جميعا ان شاء الله



الحاضرين في الفندق في منتهى السعادة



احد الحاضرين – ماشاء الله .. حاجة جميلة جدا .. كان نفسي أكون معاهم الجماعة دول


واحد تاني – انا حجيت قبل كده .. بس أول مرة احس بمعنى الحج .. وازاي انه مؤتمر للمسلمين .. ورمز لوحدة الأمة



ابوجهل بيسأل إبليس



أبو جهل – إيه ده يا إبليس .. أنا قلت هاجي ألاقي الناس هنا شغالين رقص وطبل وزمر .. إيه اللي بيتفرجوا عليه ده ؟؟

ابليس ( في خزي شديد ) – ده برنامج صناع الحياة .. مجموعة ناس في منتهى الخطورة .. مسببين لي صداع مستمر .. ودلوقت هم في الحج وعاملين الندوة دي لمناقشة أحوال المسلمين

ابو جهل – في الحج ؟؟ فين يعني ؟؟ في منى ؟؟

إبليس – أيوه

أبو جهل – دعني أرجع إليهم فأمزقهم إربا إربا .. واللات والعزي لا أبقى منهم أحدا

إبليس – ياجدع انت ما تفوق بقى .. دول هناك كلهم مسلمين .. انت فاكر هترجع هناك هتبقى سيد قريش .. خلينا نفكر بالعقل وبلاش التهور بتاعك ده

أبو جهل – يعني انت شايف كده .. طيب هتعمل إيه ؟؟

ابليس – مش هاقدر اعمل حاجة طول ما هم هناك .. انا اخاف اروح لإن ده معاد رمي الجمرات .. كلهم بيروحوا هناك يحدفوني بالطوب .. لو شافوني هيقطعوني حتت .. أنا هاستنى لما يروحوا بلادهم ويبقى لي معاهم كلام

أبو جهل – وهم بيحجوا وللا بيعملوا ندوات

ابليس – ما هي دي المشكلة اللي تاعباني جدا .. الناس زمان كانوا بيروحوا الحج .. زي ما راحوا زي ما جم .. دلوقت بقوا يتقابلوا مع بعض .. ويناقشوا مشاكلهم .. ويساعدوا بعض .. مش ممكن اللي بيحصل ده .. هيهدوا كل اللي بنيته في القرون اللي فاتت .. أنا خايف أوي يا بو الحكم .. خايف أوي

أبو جهل – طيب .. طيب .. ما تزعلش نفسك .. تعال نرتاح شوية .. وبعدين نفكر سوا هنعمل إيه



يرتاحوا شوية .. بعد العصر إبليس جاي له دعوة لحضور ندوة ثقافية .. ياخد أبوجهل ويروحوا .. ناس محترمين أوي .. كله لابس بدل .. و فورمال ميه ميه .. سيدات المجتمع حاضرين .. بعد كلمة الافتتاح يتقدم الضيف الكبير لإلقاء المحاضرة



الضيف – حقيقة الأمر أن انعكاس مؤثرات اللاوعي على أداء الأنا الداخلية يؤثر سلبا على المنظومة المتكررة خارج الحيز المنظور .. وقد أكد هذه النظرية الأديب الكبير زكي هلاوس حين استدعى مفردات الذهن من أعماق التاريخ .. وهذا بلاشك من أروع ابداعات الحضارة الإنسانية



تصفيييييييييييييييييق هيييييييييييه .. يا دين النبيييييييييي .. ايه الحلاوة دي .. قول كمان يا أستاذ .. بتقول درر والله



الأستاذ – شكرا شكرا .. وكما قلنا .. فإن الواقع الحضاري ما هو إلا إفراز لمكنونات غير مستقرة .. وكلما ازداد استقرار هذه المكنونات كلما تطور الواقع الحضاري ليؤثر وبفاعلية في المنظومة الابداعية .. واود أن أؤكد على أمر في غاية الأهمية .. وهو أن اللاوعي بلاشك يلعب دورا رئيسيا في إزالة الفجوة بين الحاضر والمستقبل ..



التصفيق الشديد يقاطع المحاضر أكثر من مرة



ابو جهل – الراجل ده بيقول ايه يا إبليس يا خويا ؟؟ .. انجليزي ده يا مرسي ؟؟



بعض الحاضرين ينظرون شذرا لابو جهل .. ويتأففوا من مقاطعته .. وجهله بثقافة اللاوعي



ابليس – بس يابو الحكم .. بس .. ده استاذ كبير أوي .. بس احسن الناس بيبصوا لك

ابو جهل – ناس ايه يا عم .. اقطع دراعي ان كان حد منهم فاهم حاجة .. والله شكلهم جايين يتمنظروا وياكلوا ويمشوا

ابليس – طب تعال بره .. تعال ما تفضحناش .. ياللا نطلع قبل ما ننضرب



يطلعوا بره



ابليس – ما هو انا ظبطت شوية ناس ولمعتهم عشان يطلعوا يقولوا أي كلام .. والناس تصقف لهم .. وكله يضحك على بعضه .. والاسم مثقفين .. وفي الآخر البلد بقت واخدة صفر ثقافي ..وصفر رياضي .. وتحت الصفر اقتصادي

أبو جهل – أهو كده طمنتني .. ده انا كنت بدأت اخاف على البلد

ابليس – لا اطمن .. اخوك صاحي وشغال



يمشوا في الطريق .. يسترعي انتباه أبو جهل بيت قدامه زحمة .. وحركة كتير وسيارات واقفة تحت منتظرة .. يروح يشوف .. يلاقي عنوان كبير ( دار تحفيظ القرآن ) .. ولد صغير طالع من البيت .. أبو جهل يسأله



أبو جهل – لو سمحت .. ايه الزحمة دي ؟؟ هو فيه إيه جوه ؟؟

الولد – دي دار التحفيظ .. بنيجي هنا نحفظ قرآن

أبو جهل – يعني إيه ؟؟ .. مدرسة يعني ؟؟

الولد – لأ .. بعد المدرسة باجي هنا أنا وأصحابي عشان نحفظ القرآن .. الحمد لله أنا حفظت نص القرآن .. وناوي أختم السنة الجاية

أبو جهل – طيب انت مش بتحب تلعب احسن .. ليه تعقد نفسك كده وتحفظ القرآن وانت صغير

الولد – أنا بالعب برضه .. بس اللعب له وقته والقرآن له وقته .. والقرآن هو اللي هينفعني في الآخرة .. ويحفظني من الشيطان

أبو جهل – الشيطان ؟؟ .. آه صحيح .. هو راح فين ؟؟

الولد – هو مين ؟؟

أبو جهل – لا لأ .. مافيش .. أنا كنت باكلم نفسي .. عن إذنك

الولد – لو حضرتك تعبان .. نوصلك .. بابا مستنيني بالعربية

أبو جهل – لا لأ .. شكرا



يتلفت أبو جهل بحثا عن صديقه اللدود ابليس .. يلاقيه واقع على الأرض نظرا لاقترابه من نطاق القرآن .. مش قادر يمشي .. يتعكز عليه .. ويمشوا سوا يجروا أذيال الخيبة



وتوتة توتة .. إيييييييييييه ؟؟



&&&&&&&&&&&&&&&&&&


بقلم الكاتب/ محمد عبد السلام


**************


ملحوظه : اي توجهات سياسيه او اراء عن اشخاص بعينها في الواقع هى تمثل فقط و جهة نظر و رأي الكاتب و ليست وبالضروره وجهة نظر المدونه

هناك 11 تعليقًا:

مرايتى يقول...

أول تعليق
حمد الله على السلامه
الحلقه متاخره شويه مش كده
بس بجد للأسف معاك حق يا أبا جهل

أعود بالله من شر إبليس وشركه

فى إنتظار باقى الأحوال المصريه

تحياتى

osama44 اسامه 44 يقول...

ماشاء الله جميله

بجد حلوه
مش عارف اقول
دمت رائعا

اقصوصه يقول...

حلوه وايد

استمتعت بقرائتها:)

سمسم/سما يقول...

السلام عليكم
تسلم ايدك
واقع صحيح بكل تفاصيلو وخطوطو العريضة
ربنا يحصنا من ابليس واعوانو
اللهم امين

عبد من عباد الله يقول...

سمسمه

معلش و الله اسف جداً ، بس حقيقي الموضوع مش بأيدي خالص ، بحاول على قد ما اقدر اكون متواجد بس مبيكنش عندي وقت خالص لظروف معينه نتمنى انها تنتهي قريباً ان شاء الله ...

شكراً ليكي يا سمسمه على متابعتك ، و اتمنى انك تقوليلي رأيك في البرنامجين اللي بدأت انشرهم و هما " خواطر 5 " و " علمتني الحياه " .... اشوفك على خير ان شاء الله .


**************

اسامه

الله يخليك ، الكاتب رائع جداً و ده اللي عجبني و خلاني انشرها و كل الشكر يستحقه هو .. عموماً تقدر تقول ربنا يصلح الحال إن شاء الله ..

و تقدر تقولي رأيك لو تكرمت في الحلقات اللي بدأت انشرها عن برنامجي " خواطر 5 " و " علمتني الحياه " .... و بالتوفيق ان شاء الله .


***********

اقصوصه

يا رب ديماً ، اعتقد انك قريتي حلقات منها قبل كده صح ؟؟ عموماً الكاتب رائع و يستحق الشكر وايد وايد وايد ..

و اتمنى ان اسمع رأيك حضرتك في البرنامجين اللي بدأت انشر حلقاتهم من فتره بسيطه و هما " خواطر 5 " و " علمتني الحياه "
و اشوفك على خير ان شاء الرحمن .


**********

سما

تسلم ايده - الكاتب - ابدع في الكتابه ، بس اعتقد ان دي اول حلقه تقرأيها يا انسه سما مش كده ؟؟ عموماً كويس انها حازت على اعجابك و خلتك تشرفينا بتعليقك ..

و اتمنى ان اسمع رأيك في البرنامجين اللي بدأت في نشر الحلقات بتاعتهم من فتره بسيطه و هما " خواطر 5 " و " علمتني الحياه " ...... و اشوفك على خير إن شاء الرحمن

جلال كمال الجربانى يقول...

ولسه كمان شويه
ابليس نفسه حيهج ويهاجر


ودمت بخير

رابطة هويتي اسلامية يقول...

وكما وعدناكم بأن تستمر حملتنا وتأتي بكل جديد

ضيف حوارنا هذه الرسالة :::

الأستاذ معتز شاهين - باحث تربوي

صاحب مدونة إحنا وهما

وهي مدونة تهتم بالإستشارات التربوية

نتمني منكم المشاركة معنا في الحوار لمزيد من الإستفادة ولمزيد من الإفادة

مع تحياتنا

أسرة رابطة هويتي إسلامية

مدونون من اجل الاقصي يقول...

0السلام عليكم
ربنا يبارك فيك
ويجزك كل خير
كلام قيم بالفعل
مع انو طبعا بينقل صورةواقع مؤلم

سمسم/سما يقول...

السلام عليكم
معاك حق
دي اول حلقة اقراها هنا
وان شاء اللله حبقى متابعة
وانا شفت الحلقة الاولى من خواطر لاني مشفتاش
فرمضان
كنت اتابع البرنامج لكن مش من اولو
بصراحة كنت دايما اتغاظ اوي من واقعنا
مفروضالحجات الحلوة دي عندنا احنا لمسلمين اولى بيها
والاستاذ طارق السويدان انا شخصيا من معجبيه
ربنا يكرم حضرتك وننتظر المزيد

سلمى يقول...

السلام عليكم
حلو اوى الحوار ده وتخيل لتمثيل الواقع
0000000000
شكرا لزيارتك لمدونتى
لكن فانا مثلك تماما لم اجرب الحب
لكن ما يخرج منى هو فقط احساس
دمت بخير

عبد من عباد الله يقول...

واحد من العمال

اهو لسه مش عارفين و الله هل حينتصر فعلاً و يظبط كل حاجه و يهج زي ما انت بتقول ولا لسه الخير حيقاوم و يفضل و ينتصر كمان ؟!! اعتقد احنا بس اللي نقدر نقرر مين اللي ينتصر و اعتقد ان كل واحد فينا هو اللي يقدر يقرر ينضم لجيش الخير ولا للجيش التاني !!!

عموماً شكراً لحضرتك اتمنى ان اسمع رأيك في البرنامجين اللي بدأت في نشر الحلقات بتاعتهم من فتره بسيطه و هما " خواطر 5 " و " علمتني الحياه " ...... و اشوفك على خير إن شاء الرحمن .


***********

مدونون من اجل الاقصى

اولاً اللهم فك كرب الاقصى و كرب المسلمين يا رب العالمين .. ثانياً اللي عجبني في الحلقات انها فعلاً بتنقل الواقع بس فيها ميزتين اولاً بطريقه كوميديه شويه و فيها سخريه ثانياً بطريقه تحثك على تغيير نفسك و بالتالي تغيير الواقع .


************

سما


الله يكرمك و لو حضرتك عايزة تشوفي اي حلقات قديمه هى موجوده على جانب المدونة ، اما بخصوص البرنامجين خواطر5 و علمتني الحياه فانا اعجبت بهم كثيراً لذلك قررت اني انشر حلقاتهم و اتمنى انها تنال اعجاب الناس ، و يمكن برنامج علمتني الحياه لم يكن منتشر بالشكل الكافي في رمضان و كثير من المصريين لا يعلموا الكثير عن طارق سويدان ... بارك الله فيكي و اشوفك على خير ان شاء الله .


**************

سلمى

ابداعات الكاتب بقى ربنا يبارك له و يكرمه ، و الحمد لله انها حازت على اعجاب حضرتك و اتمنى انك تتابعي باقي الحلقات و الحلقات اللي فاتت هى موجوده على جانب المدونة .