يااااااااااااااه كانت اجازه طويله اوي ، الواحد اخد استجمام هو طول اه بس كان مفيد برده ، واهو يمكن اكون وحشت الناس شويه ولا حاجه بدل ما انا كنت كل اسبوع معاكم ، ما علينا يعني بإذن الله نكمل معاكم ما بدأناه من لقطات من كتاب " حوار مع صديقي الملحد " لمصطفى محمود و بإذن الله نقدم حاجات تانيه تنال على اعجابكم ...
بس قبل ما اختم عايز اقول اني كنت ملاحظ حاجه غريبه في فتره استجمامي دي !! حسيت ان البلد حد قر عليها حد عينه حلوه كدا قال ايه البلد اللي عايشه في امان دي شويه حوادث طرق على خناقات و طوابير عيش ( اللي رجعت تاني صحيح شكلنا وحشناها ) و مفيش مشكله من كام حالة نصب حاجات مش قد كدا يعني البلد هاديه اوي يا اخونا و مره واحده الاقي في التليفزيون " الف مبروك مجلس الشوى ولع " سوري قصدي للأسف مجلس الشورى ولع !!! ولع ؟! ازاي ؟ دا مجلش الشورى ! يعني حاجه جامده يا اخونا ، يالله اهو نصيبه بقى الحمد الله ان مفيش ضحايا ، يدوب لسه مخلصين كلام في البرامج على مجلس الشورى الاقي المسرح القومي ولع !! برده .. هى ايه الحكايه انا بدأت اقلق دا برده المسرح القومي يعني مش حاجه سهله ملحقتش استغرب لقيت مباني تانيه بدأت تغير من الحرائق و خد عندك مصنع فين و مصنعين في حته تانيه و كمان خطف سياح شويه ودخلنا على ازمه ماليه عالميه و احنا اتاخدنا في الرجلين برده .. وبعدين بقى ما احنا كنا كويسين .....
بس اللي بيزيد حزني في وسط الهيصه دي كلها ان البلد دي " مصر " كانت حاجه كبيره اوي دي اللي كان العالم كله بيحكي عنها و يقولوا ( يوم ما كانت الدنيا ضلمه كان هنا عز النهار ) البلد دي اللي حطمت الاساطير و عاصمتها القاهره ( التي تقهر كل الظروف والاعداء ) فيها ظهر صلاح الدين فيها ظهر قطز فيها ظهر هارون الراشيد فيها خير جنود الله في الارض فيها بشر اعجزوا العالم حتى الان .. الفراعنه ... وفي الاخر دا يبقى حالنا !!! طيب ازاي !! هو فيه ايه مالنا ؟! ايه اللي جرالنا ؟ ليه مش قادرين نحافظ على اسم البلد دي بعد ما كان ابنها بيفتخر لما يقول انا من مصر بقى يتكسف لما يقول انا مصري !! مقدرناش نعمل لها حاجه ، معرفناش نحافظ على اسمها ، معقوله بقينا عاله عليها و نقطه سوده في تاريخها ...... سامع صوتها وهى بتقول :
جـمــل المـحـامـل بـرك مـن مـيـلـه الاحـمـال
و انـا جــمـل عـاتـي وعــلــتي الــجّــمـــال
هناك 3 تعليقات:
تقريبا ماس كهربي
او اتحسدنا
بلد كده بتقر علينا حسدتنا
بالنسبه لتعليقك فانا كنت حبيت اوضح نقط فيه
::::::::::::::::::::::
مش مستحيل ... و كلامك كويس وكل حاجه بس هو الموضوع ان في وقتنا دا الناس اللي حافظه القرآن مش قليله وفيه ناس كتيره حافظه اجزاء و لو تشوفي عدد الناس اللي في الازهر او في المسابقات حفظ القرآن ينشرح قلبك من المنظر ....
مااشااااااااااء الله وده مؤشر كويس ان فيه اهتمام بالقران اللي هو كتاب الله
:::::::::::::::::::::::::::::
بالرغم من ان الناس كترت و عدد الناس اللي حافظه القرآن كترت برده و القرآن دا هو هو اللي على ايام عمر و ابو بكر و صلاح الدين وووو .... لكن برده مؤشر الامه و العرب في النازل لان ببساطه الموضوع اتقلب الى ( هات ملزمة البرنس وانجح في الامتحان ) اه دا بقى بيحصل في الدين برده " احفظ كتاب الله تدخل الجنه " ، " قول لا إله إلا الله خمسين مره الصبح و بليل يتبني ليك قصر في الجنه " ، " قول الاذكار دي الزق يزيد و تنجح و تاخد 7000 حسنه " .... وهكذا
مش عارف هل كلامي مححتاج لتفسير اكتر ولا واضح ؟؟؟ اعتقد انه بلاش نتعامل بفكره " خربش واكسب " يا ريت نتعب علشان نلاقي .
بص اولا عايزةاقولك لاتحقرن من المعروف شيئا
وبعدين ازاي احنا العباد نحقر من اشياء ربنا عرفنا فضلها ويسدنا محمد ايضا
ترطيب لساننا بالاستغفار والذكر ده احنا مأمورين بيه
وكتاب الله انت مش شايف ان المسلمين محتاجين يحفظو كتاب ربهم بدل مايحفظو اغاني المطرب الفلاني وقصه حياه الراقصه العلانيه ؟؟؟صح ولا ؟؟
اما من ناحيه انك تقصد انه احيانا مش بيكون صح اقصد ان قلب الشخص مش بيبقي سليم
فده مش بتاعنا ولا منطقتنا ...ازاي ؟؟؟ اقولك
القلوب دي لايعلمها الا الله مالناش اننا نحكم علي حد فاهمني
اما مااقصده ان الطاعات هي اللي بتخلي الانسان يقرب اكتر من ربنا وكل شويه قلبه بينضف وعقله بيوعي
كلامك فكرني بكلام الصحابه للنبي صلي الله عليه وعلي اله وصحبه وسلم اما قالوله يارسول الله ده سكير وبيصلي معانا
قالهم دعوه لعل صلاته تهديه وسبحان الله ربنا هداه وتاب عليه
يارب تكون فاهمني
:::::::::::::::::::::::::
اول زياره لمدونتك
وانا كمان اول زياره لمدونتك
ربنا يكرمك يارب ويوفقك وشرف ليا دخولك مدونتي
بصراحه انا مش عارف اقول ايه بس اكيد لازم اشكرك لأ بجد لازم اشكرك انك تيجي لحد هنا و توضحيلي وجهة نظرك واحده واحده و كفايه انها بكل ادب ( لحسن التخبيط الجامد في الرد للأسف بقى طبيعتنا في الكلام ) و دا يدل على انك مهتمه ودا شئ يسعدني طبعاً ....
ندخل بقى في موضوعنا :
اولاً لازم اوضح حاجه اساسيه وغير قابله للنقاش و خط احمر علشان مفيش حاجه تتفهم غلط ؟؟ هى ان القرآن هو الشئ الاساسي و معه السنه النبويه و هو المعجزه الباقيه إلى يوم القيامه لان منه يتسطيع البشر الاخذ به في كل الامور حتى يوم القيامه و هو هو زي ما قلت اللي قامت عليه الدوله الاسلاميه من ايام سيدنا عمر إلى صلاح الدين و ما بعده ....
دي كانت حاجه لازم اوضحها علشان ما تخطلتش على حد في وسط الكلام اما الباقي فبصراحه لا انكر ان الموضوع كبير شويه لان للأسف بقى متشعب فينا دلوقتي ولكن ححاول اوضح قصدي بمثال و هو التعليم .. هى فيها حاجه لما تاخد ملزمه فيها المفيد كله وتدخل تجيب درجه كويسه في الامتحان ؟! ماله لما اعرف ازاي اجاوب على الاسئله واضحك على المصحح زي ما بيقولوا واجيب الدرجه التمام ؟! فيها ايه يعني لما الدكتور يقولنا متخفوش انا حجيب امتحان من الباب الاول بس و حيبقى سهل ؟! فيها ايه لما اخد التعليم كله من ابتدائي لحد الكليه وابقى مهندس قد الدنيا بالطريقه دي ؟! ها فيها ايه يعني ؟؟؟؟؟ ....
لأ فيها كتير فيها اننا كدا بنضحك على بعض ، حضرتك بتعدي من الامتحان على اساس انك فاهم الحاجات دي كويس و درجتك في الامتحان بتحدد مدى فهمك
!! فيها انك بتطلع في الاخر مهندس "كهرباء" اه بس في كيفيه الحصول على الدرجه العاليه في الامتحان مش في ازاي تركب عمود نور اللي في الاخر يفرقع فيا لان بكل بساطه عمود النور دا مكنش في الملزمه اللي جه منها الامتحان ولا كان في الباب الاول للأسف !! ....
مش عايز اطول لان الموضوع فعلاً كبير بس اللي عايز اقوله ان الملزمه مش وحشه ولا انك تعرف تحل ازاي في الامتحان حاجه وحشه ( بظبط زي الفواكه بالنسبه للأكل زي العصائر هى دي مضره ؟؟ ) بس مينفعش تكون هى كل حاجه مينفعش الملزمه و تلف ازاي على المصحح تكون هى كل حاجه يبقى احنا بنضحك على بعضنا لو سمينا دا العلم ( الذي يرفع بيوت لا عماد لها ) اللي المفروض نسافر له ولو كان في الصين ...
و هكذا الاذكار و حفظ القرآن (وانا بتكلم عن الحفظ فقط) و الادعيه و النقاب والدقن و كل الحاجات دي مين قال انها مش مهمه او انها تفاهات لا سمح الله بس في الاخر ما ينفعش تكون هى الدين و الدين يختذل فيها هى و للأسف بجد انا شفت ناس من طلاب الازهر و طبيعي حافظ كتاب الله او حتى جزء منه ناهيك عن الاذكار طبعاً و الحاجات دي بس لمجرد انه كان بيشرب سجاره قدامي و قال كلمتين مش ولابد كل اللي بيعمله دا بقى صفر ( لأ مش صفر للأسف دا بيبقى بالسالب و طبيعي جداً بعد كدا الناس تقول اهم المتدينين بقى بصوا ، يا عم الحاجات دي ملهاش دعوه بالدين خالص دي مظاهر كدابه ) ....
بجد اسف على التطويل بس حاولت اختصر و اوضح في نفس الوقت و لسه الموضوع كبير و برده احب اقول انها في الاخر وجهات نظر مش معركه للي يكسب دا لاني اساساً مش مختلف معاكي يعني و عموماً لكي مني كل تحيه وتقدير و شكراً للمره التانيه لزيارتك و اهتمامك بالتوضيح و انك بتحاولي تنفعي الناس .
السلام عليكم ورحمه الله وبركاته
تشكرني علي ماذا اخي شرف لنا والله ان نتحدث مع اشخاص محترمون
بالنسبه لكلامك عن الملازم والتعليم والحاجات دي فنا موافقاك تماما ودي حاجه للاسف بنعاني منها دلوقتي
يعني اما كنت في الجامعه كنت بتعب نفسي جدا واذاكر الكتاب كله وبقيه الدفعه قبل الامتحان بشهر تشتري تلخيص ودمتم كنت بتضايق اه
لكن كنت بفرح اما الاقي ثمره تعبي ع الاقل اطلع فاهمه
::::::::::::::::::::::::::::
اما بالنسبه لكلامك عن النقاط الاخري
فانا ايضا معاك
ولو لاحظت في تدوينتي بقول ان يعلمنا يعني علم مش اقصد الحفظ
ياسلام لو حفظنا جزء واحد فقط من القران وعرفنا تفسيره وعملنا بيه
القران يتحكم في تصرفاتنا والله ده مكسب كبير اوي لنا
فيه حاجه كمان
انا منتقبه قبل ماارتدي النقاب وقفت وكلمت نفسي وقلت
هل جواكي هيكون زي الظاهر ولا الظاهر غير الباطن وماخفي كان اعظم
طبعا مااكدبش عليك ان البواطن لايعلمها الا الله ولولا ستر ربنا علينا كنا كلنا فضحنا
ولكن الله سلم وايضا النقاب علمني الكثير فاحترمت نفسي بارتداؤه
اما من ترتديه او من له لحيه او من هو خريج الازهر ويسب ويلعن ويشرب السجائر فللاسف فلايستحق انه يكون قدوه وايضا لازم نفرق بين الدين والاشخاص
فان فعلت حسنا فانا مجرد فرد
ولكن يبقي الدين هو الصيحيح ولكن التطبيق هو الخطا م بعض الناس
جزاك الله خيرا وعذرا علي الاطاله ايضا
انا امر بظروف ولكن دخلت فقط لاتناقش معك
علي فكره
ليس النقاش ابدا لان نثبت ان واحدا منا علي صواب والاخر علي خطا
بل علي العكس
من النقاش يظهرلنا مواضيع ونقاط قد نغفل عنها كلينا
بورك فيك ورزقك الاخلاص والقبول
إرسال تعليق