العباره ...

بخصوص موضوع العباره اللي طلع من تاني و فضلنا نقول حسبي الله و نعم الوكيل تاني و طلعت البرامج تتكلم في الموضوع تاني و احنا زعلنا احنا كمان تاني ..

اولاً انا مش حدخل الكلام عن الحكم و ممدوح اسماعيل و الكلام دا لان دا يعتبر من الجزيئات و انا ما يهمنيش ممدوح اسماعيل يتسجن ولا لأ لاني معرفش اساساً هو فعلاً المسؤول ولا لأ انا زي اي حد من الناس بسمع الكلام في الاعلام و كل اللي اعرفه عن القضيه زي ما معظم الناس تعرف " بيقولوا " بيقولوا انه معملش كذا ، بيقولوا انه دفع رشاوي ، بيقولوا انه فوق القانون ، بيقولوا بيقولوا ....

لاني اللي يهمني حل المشكله و المشكله هى الحوادث الكتيره اللي بتحصل نتيجه الاهمال ، عباره بقى قطار و لا مواصلات عاديه ، و لكن كما اني معتقد ان الخساره في الحرب لا يتحملها فرد و الخساره في مباراه كره القدم لا يتحمل خسارتها فرد ايضاً و فانا مقتنع ان حادثه كالعباره لا يتحمل مسؤليتها فرد او حتى 20 فرد ....

يمكن مش حقدر اشرح كل كلامي بالتفصيل ويمكن كلامي كتير قوي محدش يفهمه لانه فعلاً عايز توضيح كتير ولكن انا عايز كتاب علشان اقدر اقول اللي اقصده ولو قلته في ناس كتير حتزعل مني بجد ، لان كارثه زي العبارة دي كارثه مجتمعيه ، آسف ان اقول ان المجتمع يتحمل مسؤوليتها بالكامل ، المجمتع اللي اخرج ناس تسمح في انتشار الفساد بهذه الصوره من اول الموظف البسيط الذي اخذ الرشوه و مرر الفساد من ناحيته إلى من تساهل في المراقبه على صلاحيات العباره ... و إن كنا بنتهم ناس كتير اول كبار انهم وصلوا بالرشاوي و انهم كل حاجه معاهم بالرشاوي فلازم نعرف اننا احنا اللي بناخد الرشاوي دي .... مش عايز افتح في الكلام كتير لانه موضوع كبير اوي اوي اوي .

و بخصوص الاستاذه نواره كانت سألت سؤال كدا عن التعليق على احكام القضاء و ليه غلط يعني اننا نعلق على احكام القضاء يعني نتظلم وكمان ما نقدرش نقول ااااه ؟

انا مش حتكلم بأسم القانون لاني مش خبير فيه لكن موضوع انه غلط التعليق على احكام القضاء دا طبيعي و دا المفروض لان القضاء دا يعتبر جهة التحكيم بين الخصوم ولا يصح التشكيك في جهة التحكيم ... يعني على سبيل المثال : حصل خلاف معايا و مع واحد تاني و قولنا خلاص احنا نروح لحد يحكم ما بينا و احنا الاتنين نبقى راضيين باللي يقوله ، رحنا للأستاذه نوراه وقولنا خلاص هى اللي حتحكم بينا و احنا الاتنين حنرضى بالحكم و موافقين عليه ، ما ينفعش بعد ما الاستاذه نواره تدرس المشكله و تلاقيني انا غلطان و تحكم بحاجه ضدي اروح قايل " لا بقى دي ما بتفهمش ، دي اكيد مرتشيه و الله حرام دا انا مظلوم " ما ينفعش و انا مليش علاقه دلوقتي بقضيه العباره ولا غيرها انا بتكلم عموماً على القضاء .

من قلبي :

يا رب اصلح حالنا ، و بدلنا بجيل خير منا ينصر ويرفع هذه البلد لاننا لم نستطيع ان نفعل لها شئ يجعلها حقاً مصر التي ذكرت في القرآن .