أنا مصرى أبن مصرى وليا الشرف
برغم المهانة برغـــــــــــــــم القرف
برغم الزبالة اللى مالية الشــــــوارع
برغم الفســـــــــــاد اللى بيه اعترف
سمو معـــــــــــــــالى رئيس الوزارة
نتيجة موظف بسيـــــــــــــط انحرف
برغم المجاعة اللى داخلين عليهـــــا
وفينا اللى عـــــــايش حياته فى ترف
برغم البطــــــــالة فى أوضـة وصالة
برغم أن أخـر جنيـــــــــــــه اتصرف
برغم طـــــــــــابور الصباح السخيف
وكل منايا يادوب كــــــــــــــام رغيف
برغم أسايـــــــــا لمنظرعشايـــــــــــا
وأقول مش مهم يـــــا واد نام خفيف
برغم إنى شايف بــــــــلاوى وساكت
وعايــــش مطنــــش كــــــأني كفيف
برغم وزارة رئيسهــــــــــــا حـرامي
وشوفوا البجاحـــــــــة يقولوا نظيف
برغم الســـــــلام اللى غرقت بناسها
برغم العيـــــال اللى ساكنة الرصيف
برغم حكومة شعـــــــــــــارها الكلام
ورغم رئيسنــــــــــــا عليه الســـلام
ورغم أن كله يـــــــــــا عالــم بيغلى
إلا كرامتى بترخــص قـــــــــــــــوام
برغــــم إنى عايش في بلدى فريسة
ووجبة شـــهية لبعض اللئــــــــــــام
برغم أن كـــــــــــــل تاريخك يا بلدى
فى عهد جنابه كـــــــلام فــوق رخام
برغم ده كلــه يــــــــــــا مصر بحبك
وطــظ فيهــــم .. ودا آخـــر كـــــلام !
******************
ملحوظة : ابلغتنا الاستاذه نوارة ابنة شاعرنا الكبير احمد فؤاد نجم ان هذه القصيدة ليست له .. رجاء من يعرف كاتب القصيدة يخبرنا به .
هناك 3 تعليقات:
القصيدة دي مش بتاعة بابا
السلام عليكم ورحمة الله وبركاته
انا قولت اجى ازورك بعد تعليقك التانى عند نوارة بصراحة اعبجنى منطقك
والقصيدة اكيد مصرى جميل الى كتبها...بغض االنظر عن هويتة ...
تحياتى لحسن اختيارك
اللي كتبها كل اهل مصر الحقيقيين لأن هناك اخرين مزيفين وهؤلاءيعيشون داخل اسوار ليس فيها شئ مما تصفه القصيدة
دعواتي لك بالتوفيق في امتحاناتك المقبلة ان شاء الله
إرسال تعليق