استراحه طويلة

هنستريح شويه الايام دي و هريحكم مني علشان الضغط ما يرتفعش اكتر من كدا و العبد لله طبعاً هيريح غصب عنه امتحانات و ثانويه وعنق الزجاجه و مستقبلك و حياتك وربنا يكرمك بكليه حلوة ( دا ولا كأني بنقي طماطم يا عم ) ما علينا كله عارف قصة الثانويه دي و المعظم جربها او سمع عنها اما عن الايام الجايه دي في المدونه فحتبقى مواضيع خفيفه كدا و حنبدأ الايام دي بشويه اشعار لاحمد مطر الشاعر اللي انا معجب بيه جداً رغم انه مش مشهور اوي .... حنبدأ بس الله :

فصيحنا

فصيحنا ببغاء،

قوينا مومياء،

ذكينا يشمت فيه الغباء،

ووضعنا يضحك منه البكاء،

تسممت أنفاسنا حتى نسينا الهواء،

وامتزج الخزي بنا حتى كرهنا الحياء،

يا أرضنا، يا مهبط الأنبياء،

قد كان يكفي واحد لو لم نكن أغبياء؛

يا أرضنا، ضاع رجاء الرجاء،

فينا ومات الإباء،

يا أرضنا، لا تطلبي من ذلنا كبرياء،

قومي احبلي ثانية،

واكشفي عن رجل لهؤلاء النساء!

*************************

الفتنة اللقيطة

إثنان لا سواكما، والأرض ملك لكما

لو سار كل منكما بخطوه الطويل

لما التقت خطاكما إلا خلال جيل.

فكيف ضاقت بكما فكنتما القاتل والقتيل؟

قابيل.. يا قابيل

لو لم يجئْ ذكركما في محكم التنزيل

لقلت: مستحيل!

من زرع الفتنة ما بينكما..

ولم تكن في الأرض إسرائيل؟!

*************************

نكتفي بهذا القدر إلى حين اخر إن شاء الله

الجزء الثاني من ....رسائل تاريخيه

في هذه المره لن اتكلم كثيراً سأترك القراءه لكم والتعليق والتعقيب لكم انتم ، لان الرسالتين من الصعب ان اعقب عليهم يكفي فقط ان الرسالتين من صلاح الدين و ريتشارد قلب الاسد ...

بعث ريتشارد قلب الأسد برسالة إلى صلاح الدين الأيوبي جاء فيها:

من ريكاردوس قلب الأسد ملك الإنجليز إلى صلاح الدين الأيوبي ملك العرب

أيها المَولَى..

حامل خطابي هذا بطل باسل صنديد، لاقى أبطالكم في ميادين الوغى، وأبلى في القتال البلاء الحسن، وقد وقعت أخته أسيرة، فقد كانت تدعى (ماري) وصار اسمها (ثريا).

وإن لملك الإنجليز رجاء يتقدم به إلى ملك العرب وهو: إما أن تُعيدوا إلى الأخ أخته، وإما أن تحتفظوا به أسيراً معها، لا تفرِّقوا بينهما ولا تحكموا على عصفور أن يعيش بعيداً عن أليفه.

وفيما أنا بانتظار قراركم بهذا الشأن، أذكِّركم بقول الخليفة عمر بن الخطاب ـ وقد سمعته من صديقي الأمير حارث ـ وهو: " متى استعبدتم الناس وقد ولدتهم أمهاتهم أحراراً؟ ".

***********

فردَّ عليه صلاح الدين على رسالة ريتشارد..

من السلطان صلاح الدين الأيوبي إلى ريكاردوس ملك الإنجليز

أيها الملك: صافحتُ البطل الباسل الذي أوفدتموه رسولاً إليّ، فليحمل إليكم المصافحة مما عرف قدركم في ميادين الكفاح.

وإني لأحب أن تعلموا بأنني لم أحتفظ بالأخ أسيراً مع أخته؛ لأننا لا نُبقي في بيوتنا سوى أسلاب المعارك، لقد أعدنا للأخ أخته. وإذا ما عمل صلاح الدين بقول عمر بن الخطاب، فلكي يعمل ريكاردوس بقولٍ عندكم: " أعطوا ما لقيصر لقيصر، وما لله لله". فرُدَّ أيها الملك الأرضَ التي اعتصبتَها إلى أصحابها، عملا بوصية السيد المسيح عليه السلام.

*************

اتذكر هنا قصيده احمد مطر وهو يقول كلمه للعرب و الامه حكامها و شعوبها ، كلمة حقاً قاسيه و اسم الكلمه اقسى ، فهى تحت اسم " ورثة ابليس "

وجوهكم أقنعة بالغة المرونة،

طلاؤها حصافة، وقعرها رعونة،

صفق إبليس لها مندهشا، وباعكم فنونه،

وقال: "إني راحل، ما عاد لي دور هنا، دوري أنا أنتم ستلعبونه"

ودارت الأدوار فوق أوجه قاسية، تعدلها من تحتكم ليونة،

فكلما نام العدو بينكم رحتم تقرعونه،

لكنكم تجرون ألف قرعة لمن ينام دونه،

وغاية الخشونة،

أن تندبوا: "قم يا صلاح الدين، قم"، حتى اشتكى مرقده من حوله العفونة،

كم مرة في العام توقظونه،

كم مرة على جدار الجبن تجلدونه،

أيطلب الأحياء من أمواتهم معونة،

دعوا صلاح الدين في ترابه واحترموا سكونه،

لأنه لو قام حقا بينكم فسوف تقتلونه.

حسبي الله ونعم الوكيل !!

اقرب كلمة يقولها رجل متضرر مما حدث في إضراب 6 ابريل .... للأسف حدث ما كنت اخشاه ، قالوا اضراب ولو بتحب الوطن اضرب ولو عايز الحال يتصلح ولو نفسك البلد تتغير و و و ....... اخاف من اللعب على وتر العاطفه والحماسه و الناس تعبت من الغلاء و ضيق المعيشه فعلاً بيخلي الدماغ في حالت شلل عن التفكير و بصراحه المرتبات عايزة اجتماع لكل علماء الإقتصاد في العالم علشان تعرف ازاي المواطن يعيش بيها واعتقد انهم حيطلعوا من الإجتماع على مستشفى الامراض العقليه .

اظن الناس شافت اللي حصل في المحله شئ لا يرضي اي انسان ولا كأننا كلنا مصريين ناس تحرق وناس تضرب و العسكري الغلبان اللي طالع بالامر دا يضرب و اصحاب المحلات اللي اتكسرت راجل رايح شغله ولا حتى معدي في الشارع لما يضرب ولا تتكسر رجله ولا يموت يعني اقل كلمه حتطلع من الناس دي ... حراااام حرااااااااام .

طيب و بعدين يعني ما نعملش اضراب يعني الحكومة تبهدل فينا وما نقولش لأ كمان .. مش قصدي كدا طبعاً بس كل اللي شاف اللي حصل في المحلة مجمع على ان دا شئ فظيع لا يرضي عدو ولا حبيب .... بس يمكن ليا وجهة نظر ناس كتيره اوي مش حتعجبها او حتدايق مني الفكره كلها انك لما تيجي تسأل اي حد من الشعب حيقولك " خلاص بقى زهقنا عايزين تغير مش قادرين نستحمل اكتر من كدا " وانا معاه فعلاً الحكايه زادت اوي بس يمكن اختلافي معاه او مع غيره في طريقه الحل ...

فهو ممكن يكون عنده طرق كتيره للحل ولكن كلها تصب في فكره واحده ان التغير لازم يجي من فوق لازم اللي فوق يتغير علشان البلد حالها ينصلح وانا مش مختلف اوي معاه في الحته دي لازم اللي فوق يتغير بس مختلف ان مش لازم هو الاول اللي يتغير شايف ان التغيير لازم يجي من تحت من الشعب نفسه .. طبعاً دي كلمه كبيره اوي يعني ايه من الشعب نفسه ! يعني الشعب دا يلم نفسه كدا في ميدان و يقول هيييييه انا الشعب حتغير !!

لأ بس الفكره ببساطه ان لو احنا مجموعه من الناس ( طلبه ولا عيله ولا سكان في بيت واحد ) وجه واحد اشتغل معانا و اديناله فلوس وبدأنا نشتغل ومره واحده بقى يسرقنا وياخد فلوسنا قولنا نروح ناخد فلوسنا منه ، معرفناش ناخد حاجه طلع راجل مسنود ومش عارفين ناخد منه حق ولا باطل طيب وبعدين حنعمل ايه .. ( هنا الاختلاف ) زمان كنا نقف مع بعض كلنا في محنه واحده ولازم نساعد بعض و نشوف مين مننا اتاخد منه فلوس كتير ونحاول نقف جنبه لو انا معايا عشره جنيه و التاني ابنه بيعيط عايز حاجه كنت اديله تلاته ولا اربعه ولا حتى خمسه جنيه ، كان التكافل والتكاتف دا بيخفف من حده المشكله و ربنا بيوقف معانا و لو سألت اي حد عن زمان تلاقيه يقولك

" يا ابني زمان كانت الفلوس اقل من كدا بكتير ومكانتش الحاجات متوفره زي دلوقتي المعيشه دلوقتي بقت اسهل والفلوس كترت بس بيني وبينك الناس هى اللي اتغيرت مبقاش حد بيبتسم للتاني صدقه زمان كان الواحد تعبان اليوم كله بس بليل بينام مرتاح لا ظالم حد ولا حد مدايق منه لكن دلوقتي ربنا اعلم بالحال "

طيب دا كان زمان لكن دلوقتي لو الراجل دا نصب علينا ومعرفناش ناخد حقنا للأسف بننصب على بعض وبكل بساطه لو سألت حد فينا ليه بتنصب ؟! حيقولك " اصل الراجل دا نصب عليا وخد فلوسي يعني اعيش ازاي " تبصله انت .. طيب دا سرقك مالك انت بقى بالراجل دا هو عملك حاجه دا مسروق زيك ومنصوب عليه " .... طيب و انا جبت الكلام دا منين ؟!! من الشارع من الناس هو دا حالنا و دلوقتي حترجمه للي بيحصل بظبط ....

اللي فوق بيسرقونا واحنا بنسرق في بعض .. فتنزل الصبح تروح اي مصلحه حكوميه علشان تخلص ورقك تلاقي صاحبنا يقولك معلش فتح مخك معانا يا باشا طبعاً تفهم انت وطلع علطول بس قلبك من جوه بيدعي عليه تخلص من دا تروح لواحد تاني يقولك بإبتسامه عريضه معلش حق الشاي يا فندم كل دا وانت بتطلع من جيبك و تخلص الورق تروح تشتكي للحي يقولك علشان تقدم الشكوى لازم كذا وكذا من الاخر فك الكيس علشان ما نلعبش معاك خلاويس وبعد ما ترجع البيت تبقى عمال تقول في نفسك يعني انا الاقيها من المرتب ولا من الناس اللي عماله تاخد في فلوسي و كمان علشان اخد حقي مش اكتر .. ( عارف المشكله في ايه ؟ ) انك بعد ما تفكر تروح رايح شغلك اللي هو مصلحه حكوميه برده و تطلع كل اللي اتعمل فيك في الناس وتاخد من دا وتاخد من دا ... مش بقولك بنسرق بعض .

وبعدين لما تيجي برده تسأل حد ليه بتعمل كدا ؟ يقولك نفس الإجابه اللي اتقالت فوق " يعني انت مش شايف الدنيا بقت غاليه ازاي و المرتب مش مقضي طيب احسبهالي انت ازي اربي ازاي اكل ازاي اعلم ...." طيب ما انت اللي بتنصب عليه دا زيك كدا برده يا عم الحج مهواش من البشوات ولا مليونير يعني برده مرتبه زي وعايز يربي ويعلم و يأكل بس المشكله انك حتاخد رزقك هو هو بالسرقه من غير سرقه رزقك هو هو بس الفرق انه كدا حيبقى حرام ومفيهوش بركه .

اسف اني طولت شويه بس كان عندي وجهة نظر يا رب اكون عرفت اوصلها .... والله المستعان .

ما هى الوطنيه لو بفلوس كنا اشتريناها !!!

اه والله كنا اشتريناها بدل التعب دا كله لإن الواحد المفروض يكون وطني ( لا مش يكون في الحزب الوطني لأ يعني يحب البلد ) وبما اننا في الفتره الاخيره دي الوطنيه بدأت تنقح علينا جامد من كاس الامم الإفريقيه و الاحداث اللي في البلد وكمان دلوقتي يجي دور الاغاني الوطنيه كمان لتعبر عن وطنيه المغني نظراً لانه مش بتاع حب و بس لأ دا كمان وطني يعني مش اقل من اي واحد .. شئ جميل .

بس في حاجه كدا بستعجب ليها هى الوطنية دي ليها مواسم يعني بتيجي كام شهر في السنه دي ؟؟ ليها محلات طيب بتعرضها ؟ موجوده في كارفور يا جماعه ؟ مش عارف اسئلة محيراني بس المحيرني اكتر ايه اللي جاب الإنتخابات للوطنيه كل ما تحصل إنتخابات او حتى تعديلات في الدستور اي حاجه تحصل فيها اقتراع سري لازم الاقي التليفزيون كله بيزغرد بالوطنيه !!! طيب دي ناس بتنتخب وناس بتتاخنق على المناصب ايه جاب الوطنيه في النص بقى و الاقي الاغاني بحبك يا بلدي وانت اللي مربياني ( باينه محدش رباه ولا ايه ) طيب يا سيدي ماشي سيبنا من الحكايه دي ....

في بقى حاجه تاني حتجنن واعرف هو في ايه ؟ في هوجة الإنتخابات دي طلع الاستاذ تامر حسني مشكوراً بأغنيه وطنيه قولنا خير الشباب لسه حاسه بالبلد ( مش عيب برده يا جماعه يعني ما هو برده مصري ) وبعد ما خلصت الإنتخابات و متعرفش ايه اللي حصل الاقي الاستاذ بقى في السجن !! لا حول ولا قوة إلا بالله ليه ياخونا ماله الراجل ؟ قالك دا مدخلش الجيش .. جيش ؟ جيش مين ؟ بتاع الوطن لا يا راجل معقوله !! دا لسه كان .. يا سبحان الله على الدنيا وقلت في نفسي ( لقد اصابته لعنة الوطنيه ) .

بعد شويه و في نفس الوقت كدا برده طلع الأستاذ الكريم هيثم شاكر مشكرواً برده طلع لنا اغنيه وطنيه بس الاغنيه دي بقى مش زي اي اغنيه دي تثبت بجد ان الراجل دا جندي من جنود الوطن يا جماعه بيقول فيها ( ارمى حمولك عليا وانا اشيل عنك شويه يا مصر يا اغلى عندى من كل الدنيا ديه ) اهو يا اخونا بيقول ناوي يشيل عنها اهو ادي الجدعنه ولا بلاش مش غاني كدا وكلام في الهوا لازم الواحد يكون فعلي كدا وإجابي يشيل عن البلد شويه بقى ....... و لسه مكملتش كلامي الاقي اللي جنبي بيقولي " يا عم ما هو راخر اتاخد ما تامر حسني على السجن علشان حكايه الجيش دي " يا نهار ابيض يعيني على الواد دا كان لسه بيقول ارمي حمولك عليا بس باينه معرفش انه بيكلم مصر صاحبه اكبر مشاكل وهموم على العالم او ما ريحت عليه شويه مش رمت كمان لا دي بس يدوب ريحت بس كدا صاحبنا ما استحملش لا حول ولا وقوة إلا بالله في ايه يا خونا اللي بيحصل ؟ ولقد كررتها لمرة الثانيه ( لقد اصابته لعنة الوطنيه ) .

اما الثالثه فكانت صاحبه شركة مياه الدلتا و .... سوري قصدي صاحبه اغنية ( مشربتش من نيلها ) " في الحقيقه انا شربت ولا داعي لذكر ما حدث بعد ما شربت " المهم الست شرين غنت وبكل وطنيه و حب للوطن تلك الاغنية الرائعة من وجهة نظري والتى لقت نجاح رهيب حتى انها ساهمت ولو بشئ بسيط في فوز المنتخب الوطني بكأس الامم الإفريقيه وهذا ما قاله الكابتن حسن شحاته يقول " كنت في الاوقات كدا اخلي حد من اللعيبه يشغل الاغنيه دي على الموبايل بتاعه يعني بتدي دفعه للعيبه برده " و فعلاً اللعيبه كانت تشرب من هنا ..قصدي تسمع من هنا وتنزل الملعب واجوان بالتلاته والاربعه كانوا بيولعوا الدنيا ....

ما علينا خلصت كأس الامم و سمعت خبر عجيب !! ( لأ متقولش انها دخلت السجن علشان الجيش ) لا لا طبعاً صعبه دي بس هى ست زي كل الستات اتجوزت و بقت حامل و على وش ولاده كلنا ممكن نسمع ان اي ست راحت المستشفى علشان فاضل لها كام يوم وتولد او راحت الفيوم عند اهلها علشان تولد هناك .. يعني ممكن معقوله برده بس اننا نسمع انها راحت امريكا علشان تولد " ايه هى عايزة تفسح الواد في ديزني لاند !! ما هى مراجيح السيده قاعده اهي يا سيدي خلاص بلاش السيده في دريم بارك و ماجيك لاند " لا لا يا عم انت فهمت غلط دي رايحه تولد هنا علشان الواد ياخد الجنسيه الأمريكيه ... نعم ( و هنا شعرت بأن ميه النيل راحت ضاربه في نفوخي ) جنسيه امريكيه ايه ؟ ازاي يعني مش فاهم ؟ يعني الواد يبقى امريكي ولا يبقى مصري ؟ مش عارف بس سعتها برده سمعت صوت جاي من بعيييييد بيقولي ( لقد اصابتها لعنة الوطنيه ) " بس انا بصراحه مش عارف برده هل هى فعلاً علشان الجنسية وهل ملهاش اي ظروف تانيه انا بتكلم لو كان الخبر دا صحيح " قولت لأ مش معقولة كدا ربنا يستر على الباقيين اللي غنوا دا لسه كان في ناس بتغني على سينا انا خايف لسيناء تحتل ولا هما يتاخدوا في الاسر ... يا سلام عليك يا عم سيد يا حجاب بتقول كلام حكم لديه قصيده تسمى " سلو قلبي " على غرار قصيده احمد شوقي التي غنتها ام كلثوم وماذا يقول سيد حجاب في قصيدته ؟ ::

سلوا قلبي وقولوا لي الجوابا

لماذا حالنا أضحى هبابا؟

لقد زاد الفساد وساد فينا

فلم ينفع بوليسٌ أونيابة

وشاع الجهل حتي أن بعضا

من العلماء لم يفتح كتابا

وكنا خير خلق الله صرنا

في ديل القايمة وف غاية الخيابة

قفلنا الباب أحبطنا الشبابا

فأدمن أوتطرف أو تغابي

***

أري أحلامنا طارت سرابا

أري جناتنا أضحت خرابا

وصرنا نعبد الدولار حتى

نقول له(أنت ماما وانت بابا)

وملياراتنا هربت سويسرا

ونشحت من الخواجات الديابة

ونهدي مصر حبا بالأغاني

فتملؤنا أغانينا اغترابا

وسيما الهلس تُشبعنا عذابا

وتشبعنا جرائدنا اكتئابا

***

زمانٌ يطحنُ الناسَ الغلابة

ويحيا اللص محترما مهابا

فكن لصا إذن أو عش حمارا

وكل مشا إذن أو كل كبابا

ودس علي الناس أو تنداس حتى

تصير لنعل جزمتهم ترابا

أمير الشعر عفوا واعتذارا
لشعرك.. فيه أجريت انقلابا

ومانيل المطالب بالطيابة

دي مش دنيا ياشوقي بيه.. دي غابة!

ملخوظة : جميع محتوايات هذا المقال من شخصيات لا تدل على رأي شخصي فيهم فهذا المقال ليس إلا نظره عامه وساخره على الاوضاع .

الخير في امتي إلى يوم الدين ......ابشروا اهل مصر

بشائر حملة حمايه

- جريدة المصري اليوم انضمت كشريك إعلامي لحملة حماية وقامت بتوزيع ملصقات الحملة مع عدها الذي صدر بتاريخ 13 مارس 2008.

- قناة مودرن سبورت أعلنت عن انضمامها للحملة ودعمها من خلال رئيسها د.وليد دعبس، وقد قامت القناة باذاعة يومية للأفلام القصيرة الخاصة بالحملة

- برنامج القاهرة اليوم الذي يقدمه الإعلامي الكبير عمرو أديب على شبكة الأوربت أعلن عن تأييده للحملة واستضافته للداعية عمرو خالد أسبوعياً لمتابعة أخبار الحملة أولاً بأول ، إضافة لمشاركته بإعداد تقارير عن الحملة و أنشطتها المختلفة .

- موقع محيط وموقع بص و طل الإلكتروني تبنى الحملة على الصفحات الأولى للموقع لكل القراء وءذينظم شات على الهواء مباشرة مع الأستاذ عمرو خالد للحديث عن الحملة يوم الاثنين 17 مارس من السادسة وحتى السابعة و النصف مساء

- سلسلة سوبر ماركت المحمل أعلنت عن مشاركتها في الحملة وأبدت استعدادها للدعم لعلاج المدمنين وذلك بالتكفل للحالات الفقيرة غير القادرة على تحمل نفقات العلاج.

- مخبوزات ريتش بيك الشهيرة انضمت للحملة بتوزيع البوسترات مع منتجاتها على التجار ، بالإضافة إلى وضع بوسترات الحملة على سيارات توزيعها في سائر أنحاء الجمهورية

- المول التجاري الشهير هايبر ون في منطقة الشيخ زايد بالسادس من أكتوبر اشترك في الحملة بتوزيعه للبوسترات و الملصقات مع المنتجات التي يبيعها للمستهلكين

- الشركة المنتجة لبطاطس شيبسي الشهيرة قررت المشاركة في الحملة بإنتاجها لعبوات شيبسي تحتوي على شعار الحملة طوال فترة الحملة

- فريق كرة السلة بنادي سبورتنج السكندري انضم لحملة حماية لبدء علاج 5000 مدمن على مستوى الوطن العربي حيث حصلوا على موافقة من المعلن لوضع شعار الحملة على تي شيرتات اللاعبين بدلاً من الإعلانات ، ووافق المعلن على ذلك اشتراكاً منه في الحملة ، ودعماً لها

- وكيل شركة بروكتر اند جامبل العالمية في مصر أعلن عن انضمامه للحملة ودعمه لها في منطقة الدلتا والاسكندرية حيث سيقوم موزعي الشركة بتوزيع بوسترات الحملة على التجار الذين يتعاملون معهم على مستوى الجمهورية

- طفل عمره سبع سنوات أرسل رسالة إلى عمرو خالد أخبره من خلالها أنه قام بطبع الاستيكر من مصروفه ، وسأله إن كان بذلك شارك في الحملة أم لا، كما فوجئ الأستاذ عمرو خالد بأطفال 11 سنة يلبسون ... ويرتدون تي شيرات عليها شعار الحملة وبسؤالهم تبين أن كل الفصل جمع من المصروف وقرروا أن نشاطهم أنهم سيطبعوا لكل الفصول هذه الكابات والتشيرتات.

- جاء للاستاذ عمرو خالد تليفون ، أنا حسام 29 من السويس ، أنا تاجر مخدرات صغير ، أنا سمعت الحملة وشفت شباب بيضع استكير في الحي.. هل أنت مدمن ..لا؟ أنا بموت ناس .. من قتل نفسا، توب .. علي ضغوط من التجار الكبار .. أنا خايف عليك منهم حيلبسوك اي قضية .. لن أسكت.

- أعلنت محلات لوكرنفال للحلويات تبنهيا للحملة ودعمها لها.

- الفنان الكوميدي الشهير محمد هنيدي أعلن عن انضمامه للحملة واستعداده لحضور عدد من الفعاليات المختلفة للحديث عن الحملة و الترويج لها

- الفنانة أنغام قررت المشاركة في الحملة بأغنية يتم كتابتها خصيصاً لمخاطبة المدمنات و أمهات المدمنين

- الفنان التشكيلي عبد الرحمن الحسيني من صناع الحياة رسم لوحة جدارية عليها شعار الحملة ليتم الاستفادة منها وتعليقها في مكان متميز

- طلاب جامعة الملك سعود في الرياض طبعوا عشرة آلاف بوستر و ملصق للحملة وقاموا بتوزيعها ، ولأول مرة تشهد الجامعة مشاركة واسعة من الطالبات في الدعاية للحملة و الترويج لها

- مجلة حياة المصرية الشهرية قررت توزيع سي دي عن الحملة مع عددها القادم ، مع وجود صفحة للإعلان عن الحملة و الترويج لها مجاناً

- شركة سبورتيف للتسويق الرياضي اتفقت مع عدد من لاعبي كرة القدم المشهورين على حضور عدد من الفعاليات المختلفة المتعلقة بالترويج للحملة مجاناً ، ومن أشهر اللاعبين الذين سيساهمون في الترويج للحملة هادي خشبة ونادر السيد و سيد عبد الحفيظ

- المدرسة المصرية الدولية ومدرسة مودرن إيدوكشين بالهرم قرروا وضع شعار الحملة على جميع أتوبيسات نقل طلابها في مصر

- الكاتب الصحفي و النائب البرلماني مصطفى بكري رئيس تحرير جريدة الأسبوع أعلن عن دعمه للحملة ، وأبدى استعداد لنشر إعلانات للحملة ومتابعة أخبارها عبر صفحات جريدة الأسبوع.

- شركة الدعاية و الإعلان المسئولة عن الإعلانات الموجودة في طريق مصر الاسكندرية الصحراوي أعلنت عن مشاركتها في الحملة وذلك عن طريق توزيعها للبوسترات على المغادرين والزائرين للقاهرة و الإسكندرية من راكبي الحافلات المختلفة ، وسيقوم بتوزيع البوسترات عدد من الشباب المتطوعين الذين سيرتدون تي شيرتات عليها شعار الحملة

- صناع الحياة بالمنصورة اتفقوا مع عدد كبير من الأسر الطلابية داخل جامعة المنصورة على الإشتراك في الحملة من خلال تنظيم عدد من الفعاليات و الأحداث و الاحتفالات التي تروج للحملة

- وزارت داخلية الأردن و ليبيا و اليمن و الإمارات العربية المتحدة أعلنوا عن دعمهم.

- وزير الصحة الأردني أرسل خطاباً رسمياً للجنة المركزية للحملة يعلن فيها عن دعمه لحملة حماية

- شرطة دبي زادت من كمية الملصقات التي قامت بطباعتها على نفقتها الخاصة لتصل إلى 200 ألف ملصق بسبب الإقبال الشديد من شباب دولة الإمارات العربية المتحدة، وقد نظمت شرطة دبي أول نشاط في الحملة من خلال ندوة جماهيرية بنادي شرطة دبي.

- جريدة عكاظ السعودية الشهيرة أعلنت عن انضمامها للحملة كشريك إعلامي في المملكة العربية السعودية

- أعلن اللواء محمود أحمد علي رئيس الاتحاد المصري لكرة السلة عن تخصيص 50 % من دخل الاتحاد من مبارايات كرة السلة في الدورات المجمعة القادمة لصالح حملة حماية للمساهمة في علاج المدنين غير القادرين على تحمل نفقات العلاج ،كما أعلن أن الدورة المجمعة القادمة للنشائين تحت 18 سنة سيوضع باديج الحملة على جميع القمصان الرياضية لكل الفرق. كما أعلن الكابتن مدحت وردة أفضل لاعبي أفريقيا في كرة السلة عن انضمامه للحملة واستعداده للمشاركة في جميع الانشطة.

- صناع الحياة بجامعات الجزائر بدولة الجزائر قاموا بطباعة 100 ألف بوستر على حساب طلاب الجامعة وقاموا بتوزيعها ولصقها في أرجاء الجامعة وفي سائر أنحاء الجزائر

- شركة الاتصالات السعودية أعلنت عن رغبتها في الانضمام للحملة

- الجامعة الأمريكية بالقاهرة نظمت ندوة كبرى بحضور الالاف الطلاب يحاضر فيها الاستاذ عمرو خالد بتاريخ الاحد 16 مارس 2008

- إدارة المركز التجاري الشهير "فيرست مول" بالفورسيوزن قررت وضع بوث للحملة على مدخل المركز طوال فترة الحملة

- فنادق سفير في الدقي و الزمالك و الغردقة قررت وضع بوث للحملة في أفرعها المختلفة ، كما أبدت رغبتها في التعاون في الفعاليات المختلفة المتعلقة بالحملة من خلال تنظيم عدد من الندوات الإرشادية للعاملين بالفندق.

- صناع الحياة نظموا عدد من فعاليات التوعية بالحملة و الترويج لها كان من أهمها زيارة صناع الحياة بالسنبلاوين ل 800 مسجد وكنيسة في عدد من المحافظات في أربعة أيام للاتفاق مع أئمة المساجد على جعل خطبة الجمعة تركز على موضوع المخدرات

- المستشفى السعودي الألماني بالمملكة العربية السعودية قررت طبع الملصق الإرشادي الذي يحتوي على شعار الحملة وتوزيعه في أنحاء المملكة العربية السعودية ، إلى جانب تنظيم عدد من الندوات التثقيفية و حلقات البحث العلمية لمناقشة موضوع الإدمان بالاستعانة بأطباء المستشفى بمختلف تخصصاتهم.

- أغرب اتصال جاء على الكول سنتر من بنت 11 سنة أنا في كدرسة شهيرة الولاد في الفصل معانا بيخرجوا برة المدرسة في الفسحة بيشربوا بانجو ويرجعوا تاني، ماذا افعل لاكون ايجابية أمام هذا الوضع.

* موقع العربية نت يشيد بحملة حماية ..

* شرطة دبي تطبع 100 الف ستكير للنشر في دبي

* إدارة مكافحة المخدرات بالشرطة الليبية تتبنى حماية وتطبع 1000 استيكر لتوزيعها في ليبيا

* مصراوي وفي البلد وبص وطل وياللا كورة و محيط ينضمون لفريق الحملة

*إذاعة حياة الأردنية تتبني حملة حماية

* صباح الخير يا مصر يبرز حملة حماية

**********

كلمة العبد لله :

حاسس بإحساس جميل حاسس اني بقيت في بلد جميله حاسس بأمل في السنين الجايه حاسس انه فعلاً في خير وصوته بدأ يعلى ....يا ترى حد حاسس الإحساس دا زيي ؟؟