صوت المدونة

السبت، 27 فبراير 2010

وسط الميكروباصات

إلى كل من يركب الميكروباص ، و كل من اصبح الميكروباص شئياً اساسياً في حياته كما حدث معي ، فليعتبر كل راكب من صاحب هذه القصيده .......... لماذا ؟



فلنقرأ ...


وسط الميكروباصات

وانا واقف وسط الميكروبصات --- سمعت صفاره
وواحد بينادى يلا مظلات --- وفى ايده سجــاره
ركبت قوم تقعد جنبي --- بنت لكن جبــــــــاره
انا قلت ياد ليليتك بمبمي --- وقمت قالع النضاره
وقعدت اسبل بعنيا --- والبت عملت محتاره
ضحكت راحت ضحكالي --- وقالتلي ادفع يا شطاره
دفعت انا اجرة نفرين --- وقلت والله ما خساره
خليك وراها بقى فين ما تروح --- وانشا الله ما نزلت إشاره


اخوكي بقى واد جنتل مان --- أصيل كمان كلي حضاره
قالتلي يا سلام مش باين --- قلتلها هديكي اماره
مقطع السمكه ودلها --- حبيت بنات كل الحاره
من اول البت نفيسه --- لحد بنت ام بداره
وحكيتلها على بطولاتي --- وسألت انفع يا سماره
قالتلي تنفع يا عنيا --- وغمزت خلاص السناره
واتاريني مش واخد بالى --- خطيبها دنجل ابو شراره
قاعد ورايا بيتصنت --- سمع ياناس كل عباره


وقف ساعتها ونزلنى --- من الميكروباص ومقلمني
اقوله طب ما تكلمني --- ناخد وندي تفهمني
كفايه ضرب طب أشتمني
من ايد لإيد بيسلمني --- وفى كل حته يلكمنى
اه يا بطنى اه ايدي اه يارجلى --- اه ياعينى يا منخيرى اه ياودني
ورفعت ايدي وانا بتلطش --- ودعيت بقى يارب يسبني
وفقعني شلوت وحياتك --- نطرني فوق سطح عماره
يسلام عليك على مهاراتك --- ده مكنش ضرب دى كانت غاره


ومن يوميها وانا ماشى مظبوط
وإن شفت بت البس زعبوط
وإن واحده جت تقعد جنبى --- اعمل قال ايه مش مبسوط
اه ياعم اصل انا مش ناقص --- يجيلي فى القلب هبوط
كفايه عليا اللي جرالي --- دا انا لسه واخد علقة موت
ما عدتش البس واتشيك --- ولا عدش يطلعلنا صوت
دول فكروني ملك الغابه --- وصبحت تاني يوم كتكوت
صاحب عيا ضغط وسكر --- وكمان يا ناس فقع مراره


وصحيت ياناس الصبحيه --- اتاريني بحلم يا عنيا
لا لسه غيرت هدومي --- ولا حتى رحت الكليه
يا حلولي دا انا لسه بخيري --- أنيق وشيك كلي مهاره
لا دخلت اودة العمليات --- ولا كلت بوانى ولا روصيات
ولا عمري قليت انا ادبي --- ولا كنت بعاكس ستات
يا خرابي ده الوقت اهو فات --- ورايا سكاشن ومحاضرات
نطيت جريت عالميكروبصات --- سمعت صفاره !!


مجهوله الشاعر

هناك 9 تعليقات:

مرايتى يقول...

ههههههههههههههههه

أهو حلم

بس يخليه ما يحاولش حتى يعاكس بنت
العبره لمن يعتبر

بجد جميله

Mahmoud Ahmed يقول...

حلوه و الله جدا
هههههههههههه

احمد عبد السلام يقول...

جميلة جدا

وكويس ياعم ان المحنة

اخرجت لنا الكلمات الحلوة دى

Unknown يقول...

كفايه ضرب طب أشتمني

هههههههههههههههههههههههههه


مش الميكروباصات اللى عملت فيك كدة دي الكلية صدقني .. لما كنت فى الكلية زيك كنت بطلع درر ههههههههههههه

وفاء بركات يقول...

الف حمد الله علي السلامه بس بجد دمها خفيف وكويس إنك محافظ ع الشياكه والوجاها وخير اللهم ماجعله خير..
فينك من زمان لم تزور مدونتي
عايزين أحلام كلام من غير ضرب .

حازم النبراوي يقول...

هههههههه

جميلة

افروديت يقول...

جامده جدأع فكره والله برافوعليك ..متهيألي أنك مش هتحلم تاني من بعد العلقه اللي اكلتهافي حلمك ده..سلام

كلام على بلاطة يقول...

حلم يفوت ولا حد يموت

جايدا العزيزي يقول...

انا كنت دخله ارد على كنا اذلاء فاعزنا الله بالاسلام


الموضع راق لى


والمجهود واضح


ولكنى لم اتمكن من الرد



مدونتك رائعه


تحياتى